तुम्ही कोकणासाठी सरकारी मेडिकल कॉलेज मागितलं, नाही तर लोक स्वत:साठी मागतात; मुख्यमंत्र्यांचा राणेंना टोला

मुख्यमंत्री उद्धव ठाकरे यांच्या हस्ते आज कोकणातील लघू पाटबंधारे योजनांचं ऑनलाईन उद्घाटन करण्यात आलं. (cm uddhav thackeray taunt narayan rane over medical college)

उद्धव ठाकरे, मुख्यमंत्री, महाराष्ट्र

भीमराव गवळी | Updated on: Mar 06, 2021 | 1:49 PM

मुंबई: बाळासाहेबांचे सच्चे शिवसैनिक आहात. त्यामुळेच तुम्ही कोकणासाठी सरकारी मेडिकल कॉलेज मागितलं. नाही तर लोक स्वत:साठी मेडिकल कॉलेज मागतात, अशा शब्दात मुख्यमंत्री उद्धव ठाकरे यांनी भाजप नेते नारायण राणे यांचं नाव न घेता त्यांच्यावर टीका केली. (cm uddhav thackeray taunt narayan rane over medical college)

मुख्यमंत्री उद्धव ठाकरे यांच्या हस्ते आज कोकणातील लघू पाटबंधारे योजनांचं ऑनलाईन उद्घाटन करण्यात आलं. त्यावेळी त्यांनी राणेंना हा टोला लगावला. अनेकदा योजनांची घोषणा केली जाते. नारळ फोडतात आणि पुढे काम होत नाही. पण आपल्या सरकारकडून तसं होणार नाही. ज्या योजना होणाऱ्या असतात त्याचीच आपण घोषणा करतो. त्यामुळे आता या योजनांचा शुभारंभ झालाय. त्या आपण पूर्ण करणार आहोत. या योजना पूर्ण झाल्यानंतर मी स्वत: त्याचं उद्घाटन करण्यासाठी कोकणात येईल, असं आश्वासन उद्धव ठाकरे यांनी यावेळी दिलं.

तोपर्यंत शब्द देणार नाही

आपण सत्ताधारी आहोत. आपल्या पक्षाचा प्रमुख राज्याचा मुख्यमंत्री आहे. राष्ट्रवादी आणि काँग्रेस आपल्यासोबत आहे. आपली सत्ता असूनही तुम्ही काहीही मागणी करत नाही. तुम्ही रत्नागिरीसाठी सरकारी वैद्यकीय महाविद्यालय मागितलं. तुम्ही स्वत:साठी काही मागितलं असतं. पण तुम्ही ते केलं नाही. काही लोकं असतात, इकडे तिकडे काही करून स्वत:साठी काही तरी मागतात. तुम्ही मात्र कोकणासाठी सरकारी कॉलेज मागितलं. याचा मला अभिमान वाटतो. तुम्ही शिवसेनाप्रमुख बाळासाहेब ठाकरेंचे सच्चे शिवसैनिक आहात. त्यामुळेच तुम्ही स्वत:साठी काही मागितलं नाही, असा टोला त्यांनी राणे यांना नाव न घेता लगावला. मी आजही मेडिकल कॉलेजची घोषणा करू शकतो. पण मला खोटं बोलता येत नाही. पण कोकणात कॉलेज करायचं हे माझ्या लक्षात आहे. जोपर्यंत हे काम करू शकतो की नाही याची खात्री होत नाही, तोपर्यंत मी तुम्हाल शब्द देणार नाही, असंही त्यांनी सांगितलं.

केवळ घोषणा करणार नाही

मी कोणत्याही योजनांच्या केवळ घोषणा करणार नाही. ज्या गोष्टी करणं शक्य आहे त्याच घोषणा मी करेल. ज्या घोषणा करेल त्या पूर्णही करेल, असंही मुख्यमंत्र्यांनी स्पष्ट केलं.

वर्क फ्रॉम होम करा

यावेळी मुख्यमंत्र्यांनी पुन्हा एकदा कोरोनाच्या संसर्गपासून सावध राहण्याच्या सूचना केल्या. कोरोना होऊ नये म्हणून जी त्रिसूत्री आहे ती पाळा. शक्य असेल तर वर्क फ्रॉम होम करा, असंही त्यांनी सांगितलं. यावेळी त्यांनी शेतकऱ्यांचे आभार मानले. शेतकऱ्यांना मात्र ऊन-पावसात काम करावं लागतं. कोरोनाच्या काळातही बळीराजा शेतात राबला. बळीराजा नसता तर आपली अवस्था खूप वाईट झाली असती असं सांगत त्यांनी शेतकऱ्यांचे आभार मानले. (cm uddhav thackeray taunt narayan rane over medical college)

मुख्यमंत्री उद्धव बाळासाहेब ठाकरे यांच्या हस्ते लघु पाटबंधारे योजनांचा भूमिपूजन सोहळा – LIVE https://t.co/MtOYJkPBRa

— CMO Maharashtra (@CMOMaharashtra) March 6, 2021