मोठी बातमी, पदवीधरमधील पराभव जिव्हारी, कुणाची विकेट पडणार? रविंद्र चव्हाण ॲक्शन मोडवर

Graduate Constituency Election Result: विधान परिषदेच्या 5 जागांपैकी पुणे शिक्षक मतदारसंघाची जागा तेवढी भाजपला राखता आली. तर पदवीधर मतदारसंघात पक्षाचे पार पानीपत झाले आहे. अमरावती शिक्षक मतदारसंघाचा किल्ला मित्र पक्ष शिवसेनेने लढला आणि जिंकला. पण पदवीधरच्या तीन मतदारसंघातील हाराकिरी भाजपच्या जिव्हारी लागली आहे. त्यात नागपूरमधील पराभव भाजपच्या दुखत्या रगीवर, जखमेवर बोट ठेवल्यासारखा झाले आहे. या पराभवाचे कवित्व सुरू झाले आहे. आता खापर कुणावर फुटणार हे सुद्धा समोर आले आहे.

पराभवाचे कवित्व, सर्व जिल्ह्यांचा लेखाजोखा घेणार

पदवीधर मतदारसंघातील पराभव भाजपच्या जिव्हारी लागला आहे. आता या पराभवाची समीक्षा सुरू झाली आहे. नागपूर आणि पुण्यातील पराभवाची कारणं शोधण्यात येणार आहे. पक्ष संघटन आक्रमक झाले आहे. दस्तुरखुद्द मुख्यमंत्र्यांच्याच होमटाऊनमध्ये भाजपची विकेट पडल्याने आता अनेक पदाधिकाऱ्यांच्या विकेट पडतील असा अंदाज आहे. भाजप प्रदेशाध्यक्ष रविंद्र चव्हाण ॲक्शन मोडवर आले आहेत. नागपूर व पुणे विभागातील सर्व जिल्ह्यांचा लेखाजोखा ते घेणार आहेत.

या जिल्ह्यांचा आढावा घेत होणार कारवाई

पुणे पदवीधर मतदारसंघ

पुणे, सातारा, सांगली, कोल्हापूर, सोलापूर

नागपूर पदवीधर मतदारसंघ

नागपूर, चंद्रपूर, भंडारा, गोंदिया, वर्धा, गडचिरोली

भाजप पदाधिकाऱ्यांचा राजीनामा घेणार

पदवीधरमधील पराभवानंतर भाजप संघटन आक्रमक झाले आहे. भाजप प्रदेशाध्यक्ष रविंद्र चव्हाण ॲक्शन मोडवर आले आहेत. जिल्हाध्यक्ष, आमदार व मंत्री यांची झाडाझडती घेण्यात येणार आहे. भाजपच्या काही पदाधिकाऱ्यांचा राजीनामा घेण्याची शक्यता वर्तवली जात आहे. केंद्रीय गृहमंत्री अमित शाह यांची चव्हाण हे येत्या 2 नोव्हेंबरला भेट घेणार आहेत.

मित्रपक्षाच्या भूमिकेवरही भाष्य

दरम्यान आता पराभवाचे खापर फोडण्यास सुरुवात झाली आहे. नागपूरमधील पराभव हा पक्षासाठी मोठा धक्का आहे. नागपूर पदवीधर मतदारसंघाच्या निवडणुकीत मुख्यमंत्री देवेंद्र फडणवीस यांनी बंडखोरांची घरी जाऊन समजूत काढली होती. ते प्रचारात उतरले होते. केंद्रीय मंत्री नितीन गडकरी यांनी हिरारीने प्रचार केला होता. तर महसूलमंत्री चंद्रशेखर बावनकुळे हे सुद्धा प्रचाराच्या रणधुमाळीत उतरले होते. तरीही होमटाऊनमध्ये विकेट पडली. हा पराभव भाजपच्या जिव्हारी लागला.

आता भाजपने या पराभवाचे खापर मित्रपक्षावर फोडले आहे. छत्रपती संभाजीनगर मराठवाडा पदवीधर निवडणुकीत, पुणे पदवीधर मतदारसंघात शिंदे सेनेवर खापर फोडण्यात आले आहे. तर पराभवाची समीक्षा करताना महायुतीच्या मित्र पक्षांनी घेतलेल्या भूमिकेबाबत ही प्रदेशाध्यक्ष अहवाल देणार आहेत. पराभवाचे संपूर्ण विश्लेषण चव्हाण हे शाहांसमोर मांडणार असल्याची माहिती समोर येत आहे.