देवेंद्र फडणवीस, उद्धव ठाकरे आणि राज ठाकरे पहिल्यांदाच एका मंचावर, संकेत काय? टेन्शन कुणाला?

राज्याचे मुख्यमंत्री देवेंद्र फडणवीस, माजी मुख्यमंत्री उद्धव ठाकरे आणि मनसे अध्यक्ष राज ठाकरे हे एकाच मंचावर येणार आहेत. त्यामुळे सर्वांच्या भुवया उंचावल्या आहेत. तिन्ही नेते एकत्र येण्यामागे काही राजकीय संकेत तर नाही ना? अशा चर्चा रंगल्या आहेत. पहिल्यांदाच हे तीन नेते एकत्र येणार असल्याने तर्कवितर्कांना उधाणही आलं आहे. तसेच हे तिन्ही नेते काय बोलणार? एकमेकांवर टीका करणार की एकमेकांची स्तुती करणार? याकडेही सर्वांचं लक्ष लागलं आहे.

‘महाराष्ट्राच्या हास्यरेषा’ पुस्तक प्रकाशनाच्या निमित्ताने तीन प्रमुख राजकीय नेते म्हणजे मुख्यमंत्री देवेंद्र फडणवीस, उद्धव ठाकरे आणि राज ठाकरे एकाच कार्यक्रमात येण्याची शक्यता आहे. सांस्कृतिक कार्यमंत्री आशिष शेलार हे सुद्धा या कार्यक्रमाला उपस्थित राहणार आहेत. येत्या गुरुवारी म्हणजे २९ ऑक्टोबर रोजी सायंकाळी ७ वाजता दादरच्या स्वातंत्र्यवीर सावरकर स्मारक सभागृहात हा कार्यक्रम होणार आहे. यावेळी हे तिन्ही नेते उपस्थित राहणार आहेत. व्यंगचित्रकार प्रशांत कुलकर्णी यांनी ‘महाराष्ट्राच्या हास्यरेषा’ हे पुस्तक संपादित केलं आहे. ग्रंथालीने प्रकाशित केलेल्या या पुस्तकात १८८० पासूनचा प्रवास रेखाटण्यात आला आहे.

फटकारे आणि कोट्या

राज ठाकरे हे राजकारणी आणि व्यंगचित्रकार आहेत. तर उद्धव ठाकरे हे सुद्धा राजकारणी आणि फोटोग्राफर आहेत. तर मुख्यमंत्री देवेंद्र फडणवीस हे वकील आणि मुरब्बी राजकारणी आहेत. त्यामुळे हे तिन्ही नेते एकाच मंचावर आल्याने फटकारे, कोट्या आणि हशांचा पाऊस पडण्याची शक्यता आहे. यावेळी राजकीय टोलेबाजी होण्याची शक्यताही आहे. तसेच राज ठाकरे हे व्यंगचित्रांचा इतिहास आणि त्यातील बारकावेही मांडण्याची शक्यता आहे. त्यामुळे या तिन्ही नेत्यांच्या भाषणाकडे सर्वांचं लक्ष लागलं आहे.

म्हणून चर्चा…

सध्या मुख्य निवडणूक आयुक्त ज्ञानेश कुमार यांच्या विरोधातील आंदोलन, एसआयआर, कर्जतमधील वृक्षतोड आणि मनोज जरांगे पाटील यांनी महाराष्ट्राला ऐकवलेली कथित ऑडिओ क्लिप यामुळे राज्याचं राजकारण ढवळून निघालं आहे. या मुद्द्यावरून विरोधकांनी सरकारला चांगलंच घेरलं आहे. त्यामुळे गुरुवारी हे तिन्ही नेते या मुद्द्यांवर काय भाष्य करतात याकडे सर्वांचं लक्ष लागलं आहे.