आमच्याकडे 171 आमदार, सरकार पडणार नाही; एकनाथ शिंदेंनी राणेंचा दावा फेटाळला

ठाकरे सरकार मार्चमध्ये कोसळणार असल्याचा भाजपचे नेते नारायण राणे यांनी केलेला दावा राज्याचे नगरविकास मंत्री एकनाथ शिंदे यांनी फेटाळून लावला आहे. (MahaVikas Aghadi government is strong and stable, says eknath shinde)

भीमराव गवळी | Updated on: Dec 29, 2020 | 5:15 PM

मुंबई: ठाकरे सरकार मार्चमध्ये कोसळणार असल्याचा भाजपचे नेते नारायण राणे यांनी केलेला दावा राज्याचे नगरविकास मंत्री एकनाथ शिंदे यांनी फेटाळून लावला आहे. आमच्याकडे 171 आमदार असून आमचे सरकार दमदारपणे काम करत आहे. मागेही मार्चमध्ये सरकार पडणार असल्याचं भविष्य वर्तवण्यात आलं होतं. पण या सरकारने वर्षपूर्ती पूर्ण केली असून सरकारला कोणताही धोका नाही, असं एकनाथ शिंदे यांनी स्पष्ट केलं आहे. (MahaVikas Aghadi government is strong and stable, says eknath shinde)

एकनाथ शिंदे यांनी ‘टीव्ही 9 मराठी’शी खास संवाद साधत राज्यातील विविध विषयांवर आपलं मत मांडलं. सरकार पडेल म्हणून काही लोक पहिल्या दिवसापासून पाण्यात देव बुडवून बसले आहेत. पण आमच्याकडे 171 आमदार आहेत. सरकारला काहीही धोका नाही. गेल्यावर्षी मार्चमध्येही सरकार पडण्याचं भविष्य वर्तवण्यात आलं होतं. त्यानंतरही आम्ही दमदारपणे काम करत असून हे सरकार आपला कालावधी पूर्ण करेल, असं शिंदे यांनी म्हटलं आहे.

सुडाचं राजकारण दुर्देवी

शिवसेना नेते संजय राऊत यांच्या पत्नी वर्षा राऊत यांना आलेल्या ईडीच्या नोटीशीवरूनही त्यांनी प्रतिक्रिया व्यक्त केली. ही दुर्देवी बाब आहे. सुडाचं राजकारण कोणीही करू नये, द्वेषाचं हे राजकारण दीर्घकाळ टिकत नसं, असं त्यांनी सांगितलं. लोकशाहीमध्ये निवडणुका होत असतात. त्यात कोणी जिंकतो तर कोणी पराभूत होत असतो. भाजपला लोकांनी विरोधात बसवलं असून महाविकास आघाडी लोकहिताचे काम करत असल्याचंही त्यांनी सांगितलं.

शेतकऱ्यांसाठी दोन पावलं मागे या

गेल्या महिन्याभरापासून दिल्लीत शेतकऱ्यांचं आंदोलन सुरू आहे. सगळ्यांचा पोशिंदा शेतकरी संकटात आहे. त्यामुळे केंद्र सरकारने शेतकऱ्यांच्या हिताचे निर्णय घेतले पाहिजे. केंद्राने दोन पावलं मागे यायला पाहिजे, असं आवाहनही त्यांनी केलं.

विमानतळाला बाळासाहेबांचं नाव द्यावं

नवी मुंबई आंतरराष्ट्रीय विमानतळाचे काम लवकरच सुरू होईल. या विमानतळाला हिंदूहृदयसम्राट बाळासाहेब ठाकरे यांचे नाव देणं उचित आहे. राज्यासाठीचं बाळासाहेबांचं योगदान सर्वश्रुत आहे. त्यामुळे मोठ्या वास्तूंना राज्यातील मोठ्या व्यक्तींची नावे आपण देत असतो. आम्हाला ही या विमानतळाला बाळासाहेबांचं नाव द्यावं असं वाटतं, असंही ते म्हणाले. (Maha Vikas Aghadi government is strong and stable, says eknath shinde)

क्लस्टर योजना हा क्रांतीकारी योजना

ठाण्यात क्लस्टर योजना लागू करण्याचा राज्य सरकारने घेतलेला निर्णय क्रांतिकारी आहे. क्लस्टर डेव्हल्पेमेंट प्रत्यक्षात कार्यन्वित झालं पाहिजे. यासाठी ठाण्यातील विविध भागात बैठका सुरू आहेत. लाखो ठाणेकरांच्या जीवणमरणाचा विषय असल्याने ही योजना लवकरात लवकर सुरू करण्याचा आमचा प्रयत्न असेल, असंही त्यांनी शेवटी सांगितलं. (MahaVikas Aghadi government is strong and stable, says eknath shinde)

MahaFast News 100 | महाफास्ट न्यूज 100 | 3 PM | 29 December 2020https://t.co/6B1tjd545V #Mumbai #MarathiNews #Maharashatra #Politics

— TV9 Marathi (@TV9Marathi) December 29, 2020