Operation Tiger: उद्धव सेनेचा मराठवाड्यातील तो नेता गळाला? हिंगोलीचे आष्टीकर मातोश्रीवर, पण त्या खासदाराची बैठकीला दांडी

Uddhav Thackeray – Eknath Shinde Shivsena: ठाकरे सेनेचे हिंगोलीतील खासदार नागेश आष्टीकर पाटील हे आज मातोश्रीवर दाखल झाले. यापूर्वी त्यांनी उपमुख्यमंत्री एकनाथ शिंदे यांची भेट घेतल्याने चर्चा झाली होती. तर आज विधान परिषद निवडणुकीच्या पार्श्वभूमीवर मराठावाडा विभागाच्या बैठकीचं आयोजन करण्यात आले होते. त्या बैठकीला खासदार आष्टीकर हजर झाले. पण परभणीचे खासदार संजय जाधव यांनी दांडी मारली. त्यामुळे ऑपरेशन टायगरच्या चर्चेला पुन्हा एकदा उधाण आले आहे.

मराठवाडा विभागाच्या बैठकीला हजेरी

मातोश्रीवर आज स्थानिक स्वराज्य संस्था विधान परिषद निवडणुकीच्या पार्शभूमीवर मराठवाडा विभागाच्या बैठकीच आयोजन करण्यात आले होते. नागेश आष्टीकर पाटील हे जिल्ह्यातील शिवसैनिकांसह या बैठकीला हजर राहिले. या बैठकीला नांदेड, परभणी आणि हिंगोली जिल्ह्यातील पदाधिकारी उपस्थित होते. मराठवाडा विभागात विधान परिषदेच्या चार जागा आहेत. चार आमदार येथून निवडून जाणार आहेत. या जागांबाबत रणनीती ठरवण्यासाठी आज मातोश्रीवर बैठक आयोजित करण्यात आली होती. उद्धव ठाकरे, आमदार अंबादास दानवे, मिलिंद नार्वेकर यांच्या उपस्थितीत ही बैठक होत आहे.

परभणीचे खासदार संजय जाधव यांची दांडी

परभणीचे खासदार संजय जाधव यांनी या बैठकीकडे अपेक्षेप्रमाणे पाठ फिरवल्याचे म्हटले जात आहे. त्यांनी यापूर्वी एका सभेत मोठे संकेत दिले होते. मी पक्षासोबत प्रामाणिक आहे. परंतु शेवटी राजकीय परिस्थिती काय निर्माण होईल. ते उद्याचे आज सांगू शकत नाही, असे वक्तव्य खासदार संजय जाधव यांनी केले होते. त्यामुळे सर्वांच्याच भुवया उंचावल्या होत्या. ऑपरेशन टायगरची चर्चा सुरू झाली होती. आज मातोश्रीवरील मराठवाडा विभागाच्या बैठकीला खासदार बंडू जाधव यांनी दांडी मारल्याने त्याची चर्चा सुरू झाली आहे.

आमच्या मनात काहीच नाही

तर बैठकीनंतर खासदार आष्टीकर यांनी माध्यमांशी संवाद साधला. त्यांनी बैठकीतील काही महत्त्वाचे मुद्दे सांगितले. तर ऑपरेशन टायगर नाही ते स्लो ऑपरेशन टायगर असे म्हणायला हवे अशी प्रतिक्रिया दिली. गेल्या दोन वर्षांपासून ऑपेरशन टायगरची केवळ चर्चा सुरू आहे. आमच्या कुणाच्याही मनात काहीच नाही असे खासदार नागरे आष्टीकर पाटील म्हणाले. तर या चर्चांना पूर्णविराम देण्याची मागणी त्यांनी केली. उपमुख्यमंत्री एकनाथ शिंदे यांच्याशी भेटलो पण त्यांनीही कधी हा विषय काढला नाही असे आष्टीकर म्हणाले. या केवळ माध्यमातील चर्चा असल्याचे मत त्यांनी व्यक्त केले.