संजय राऊत यांची मोदींवर खोचक टीका, म्हणाले, तेच आता पप्पू…

राहुल गांधी देशातील तरुणांना देशाचं परराष्ट्र धोरण आणि आर्थिक धोरण अत्यंत सोप्या भाषेत समजावून सांगत आहेत. त्याची देवेंद्र फडणवीस हे खिल्ली उडवत असतील तर याचा अर्थ भाजपवाले हादरले आहेत. त्यामुळेच ते राहुल गांधींना टार्गेट करत आहेत. खरं तर राहुल गांधी यांनी मोदींनाच पप्पू ठरवलं आहे. मोदी हे पप्पू आहेत, अशी खोचक टीका ठाकरे गटाचे नेते संजय राऊत यांनी केली आहे. राऊत मीडियाशी संवाद साधत होते.

भारताच्या परराष्ट्र धोरणाची परिस्थिती काय आहे? गळ्यात पडणं हेच आपलं परराष्ट्र धोरण झालं आहे, ते राहुल गांधी यांनी सोप्या शब्दात समजावून सांगितलं आहे. परराराष्ट्र आणि आर्थिक धोरण हे विषय किचकट असतात. ते सामान्यांना कळत नाही. ते त्यांना सोप्या भाषेत सांगावे लागतात. राहुल गांधी ते सोप्या भाषेत सांगत आहेत. त्याची देवेंद्र फडणवीस खिल्ली उडवत असतील तर त्याचा अर्थ ते हादरले आहेत. राहुल गांधीना पप्पू ठरवण्यासाठी शेकडो कोटी खर्च केले. त्याच राहुल गांधींनी मोदींना पप्पू ठरवलं आहे. मोदी पप्पू आहेत. ते देशाचे पंतप्रधान आहेत म्हणून लोक मान-सन्मान करत आहेत. तर राहुल गांधी देशाचे नेते आहेत, असं संजय राऊत म्हणाले.

कॅबिनेटमध्ये जोकरांची फौज

मोदींच्या वाढदिवशी दिवे पेटवण्याचा कार्यक्रम झाला. मोदींना आशीर्वाद दिले गेले. हा कॉमेडीच्या वरचा प्रकार होता. मोदी लोकसभेत आणि बाहेर अनेकांची कॉमेडीचे प्रकार करत होते. नेहरू, सोनिया गांधी, राहुल गांधींची कॉमेडी करत होते. तो काय प्रकार होता? लोकसभेतही कॉमेडी करत होते? देशाचा पंतप्रधान लोकसभेत कधी चिपळ्या वाजवतो का? तो काय प्रकार आहे फडणवीस? मोदी स्टँडअप कॉमेडियन आहेत. जॉनी लिव्हरच्याही पुढचे कॉमेडियन आहेत. तुम्हाला जोकर ठरवलं गेलं आहे. देशात दोन जोकर आहेत. महाराष्ट्रात तुमच्या कॅबिनेटमध्ये जोकरांची फौजच आहेत. फडणवीस त्यावर बोला, असा हल्लाच राऊत यांनी चढवला.

फडणवीस, संयमाने घ्या

राहुल गांधी देशाचे नेते आहेत. विरोधी पक्षनेते आहेत. देशातील अंधभक्तांना देशाचं आर्थिक आणि परराष्ट्र धोरण कसं कोसळलं हे ते सांगत आहेत. विरोधी पक्षाला सोप्या भाषेत देशाचं धोरण सांगावं लागतं. कॉमेडी करण्याचा ठेका काही काय मोदींनी घेतला का? कॉमेडी कुणीही करू शकतं, असं सांगतानाच त्यामुळे देवेंद्र फडणवीस यांनी संयमाने घेतलं पाहिजे. त्यांना लवकर दिलीत जायचं आहे. त्यांना तिथे गेल्यावर या गोष्टींचा सामना करावा लागणार आहे. फडणवीस यांना त्यांच्या पत्नीने दवाखान्यात गेलं पाहिजे. ते कोणताही विषय समजून घेण्याच्या पलिकडे गेले आहेत. दोन्ही उपमुख्यमंत्र्यांनीही सोबत गेलं पाहिजे. फडणवीस यांना काय झालं ते पाहिलं पाहिजे, अशी टीका त्यांनी केली.

टीका करण्याचा अधिकार नाही का?

मिमिक्री करण्याची सुरुवात कोणी केली? त्याचे पायोनिअर मोदी आहेत. पंडीत नेहरूंची खिल्ली कोण उडवतं? इंदिरा गांधींवर टीका कोण करतं? सोनिया गांधींवर वाईट शब्दात टीका कोण करतंय? राहुल गांधींविरोधात तुम्ही कॅम्पेन करत होता, आता ते उलटलं आहे. पंतप्रधानांवर टीका करयाची नाही हे संविधानात लिहिलंय का? लोकशाहीत टीका करण्याचा अधिकार आहे. तुम्ही लोकांमधून निवडून आला आहात. त्यामुळे लोकशाहीत तुमच्यावर टीका करण्याचा अधिकार आहे, असंही ते म्हणाले.