तर दिवाळीनंतर स्फोट होतील, टणाटणा उड्या मारणाऱ्यांना बाथरूममध्ये तोंड लपवून बसावे लागेल; संजय राऊतांचा इशारा

आज टणाटणा उड्या मारणाऱ्यांनी खुशाल उड्या माराव्यात. एक दिवस त्यांना तोंड लपवून फिरण्याची वेळ येईल. यांना घरातच बाथरुममध्ये तोंड लपवून बसावे लागेल अशा प्रकारचे स्फोट दिवाळीनंतर होऊ शकतो. (sanjay raut slams bjp over anil deshmukh arrest)

संजय राऊत, खासदार, शिवसेना

Reporter Dinesh Dukhande | Edited By: भीमराव गवळी | Updated on: Nov 02, 2021 | 11:18 AM

मुंबई: आज टणाटणा उड्या मारणाऱ्यांनी खुशाल उड्या माराव्यात. एक दिवस त्यांना तोंड लपवून फिरण्याची वेळ येईल. यांना घरातच बाथरुममध्ये तोंड लपवून बसावे लागेल अशा प्रकारचे स्फोट दिवाळीनंतर होऊ शकतो, असा इशारा शिवसेना नेते संजय राऊत यांनी दिला आहे.

संजय राऊत यांनी पत्रकार परिषद घेऊन मीडियाशी संवाद साधला. यावेळी त्यांनी हा इशारा दिला. महाराष्ट्रात कायम चांगलं राजकारण होतं. आता ते बिघडवलं जात आहे. त्याची जबाबदारी भाजपवर राहणार आहे. आज ते हे सर्व पाहून टणाटणा उड्या मारत आहेत. पण एक दिवस त्यांना तोंड लपवून फिरण्याची वेळ येईल. काही लोकं म्हणतात दिवाळी नंतर असं करू तमूक करू. पण या सर्वांना बाथरुममध्ये तोंडं लपवून बसावे लागेल अशा प्रकारचे स्फोट दिवाळीनंतर होऊ शकतात, असा इशारा देतानाच पण करायचे का आम्ही? तुमच्या कुटुंबापर्यंत पोहोचायचे का? असा सवाल राऊत यांनी केला.

हे क्रुर लोक आहेत

कारवाईसाठी फक्त एकनाथ खडसेंचे नातेवाईक आणि नवाब मलिकांचे जावई दिसतात का? इतरांचे नातेवाईक का दिसत नाही? हे क्रुर लोकं आहेत. राक्षस गणातील लोकं आहेत. हे हिंदुत्वाचे नाव घेतात. पण हिंदुत्वाची व्याख्या अशी नाहीये. कितीही उड्या मारा आणि नाचत राहा. 2024 नंतर भेटू. त्यानंतर जे होणार आहे ते पाहू. मग बघा केंद्रीय तपास यंत्रणा कुणापुढे गुडघे टेकतात ते. तेव्हा तुम्ही भूमिगत होऊ नका. तुमच्याही फाईली तयार आहेत. तुमच्याही कुटुंबाच्या संपत्ती आहेत. कशा प्रकारे आणि कुठे आहेत हे आमच्याकडे आहे, असा सज्जड दमही त्यांनी दिला.

अटकासटका केल्या तरी सरकार पडणार नाही

ज्या प्रकारे केंद्रीय यंत्रणा काम करत असल्याचं दाखवत आहेत ते सर्व राजकीय षडयंत्र आहे. प्रत्येकाच्या बाबतीत हे षडयंत्र रचलं गेलं आहे. मी सुद्धा हे भोगलं आहे. आमच्या कुटुंबाने भोगलं आहे. माझ्या पत्नीला त्रास देण्यात आला. कुटुंबाला त्रास दिला गेला. ज्यांच्यामुळे भाजपचं सरकार येऊ शकलं नाही त्या प्रत्येकाला त्रास दिला जात आहे. जे लोकं भाजपाच्या अमिषाला बळी पडत नाही, सरकार पाडण्यासाठी त्यांना त्रास दिला जात आहे. तुम्ही कितीही त्रास दिला आणि अटकासटका केल्या तरी तुमचं सरकार येणार नाही, असंही त्यांनी बजावलं.

VIDEO l SuperFast News | सुपरफास्ट 50 गाव 50 बातम्या | 2 November 2021https://t.co/GUhMUwZ9M4 #SuperFastNews #GaonSuperfast #Superfast50Gaon50Batmya

— TV9 Marathi (@TV9Marathi) November 2, 2021