Anil Parab on st bus workers strike : वेतनवाढ दिल्यानंतरही कामगार संपावर ठाम असतील तर दिलेल्या पगारवाढीचाही विचार करावा लागेल; अनिल परब यांचा इशारा
आज 500 रोजंदारी कर्मचाऱ्याचा सेवा समाप्तीचा निर्णय घेतला आहे. संपाचा तिढा कायम राहिला तर पर्याय म्हणून मागच्या काही दिवसात निवड झालेल्यांबद्दल विचार करावा लागेल, असेही परब यांनी सांगितले.
मुंबई : एसटी कर्मचाऱ्यांना भरघोस पगारवाढ देऊन संप मागे घेण्याचे आवाहन परिवहन मंत्री अनिल परब यांनी दोन दिवसांपूर्वी केले होते. मात्र एसटी कर्मचाऱ्यांनी एसटी विलिनीकरणाचा मुद्दा उचलून धरत संप सुरुच ठेवला आहे. त्यामुळे अनिल परब यांनी आज कर्मचाऱ्यांना इशारा दिला आहे. वेतनवाढ दिल्यानंतरही कामगार संपावर ठाम असतील तर दिलेल्या पगारवाढीचाही विचार करावा लागेल; असे अनिल परब यांनी म्हटले आहे.
पैसे देऊन संप चालू आहे मग पैसे न देता संप चालू राहण्यात काय वाईट
राज्य सरकारने तोडगा काढून पगारवाढ केली. अनेक कामगारांनी कामावर येण्याची इच्छा व्यक्त केली, रुजूही झाले. एसटी संघटना कृती समिती यांच्याशी चर्चा झाली. त्यांना दिलेली पगारवाढ ही मूळ वेतनात दिलेली असल्याने त्यांच्या श्रेणीत तफावत निर्माण झाली आहे ही वस्तुस्थिती आहे. संप मिटल्यावर यावर विचार करता येईल कोणावरही अन्याय होणार नाही. पण बेशिस्तपणा खपवून घेतला जाणार नाही ही सुद्धा जाणीव त्यांना करून दिली.
सातवा वेतन आयोग लागू करावा, 10 वर्षांचा करार करावा अशी मागणी आली, त्यावरही विचार करू. हा करार खरं तर 4 वर्षांचा असतो मात्र 10 वर्षांच्या करारावर नक्कीच विचार करू. मात्र तोपर्यंत एसटी बंद ठेवणं ना कर्मचाऱ्यांना ना सरकारला ना प्रवाशांना परवडणारे आहे. पैसे देऊन संप चालू आहे मग पैसे न देता संप चालू राहण्यात काय वाईट, असा इशारा अनिल परब यांनी दिला.
आज 500 रोजंदारी कर्मचाऱ्याचा सेवा समाप्तीचा निर्णय घेतला
कारवाईवर कामगारांचे निरोप येत आहेत. अजून एक दिवस वेळ द्यावा, आम्ही कामावर येऊ इच्छितो. ज्या कामगारांना उद्या कामावर यायचंय त्यांना परवानगी देऊ असं आम्ही आज रात्री बसून बैठक घेऊ आणि निर्णय घेऊ. पण यानंतर कठोर कारवाई करावी लागेल, असे अनिल परब यांनी सांगितले. कारवाई रोज सुरू आहे. आज 500 रोजंदारी कर्मचाऱ्याचा सेवा समाप्तीचा निर्णय घेतला आहे. संपाचा तिढा कायम राहिला तर पर्याय म्हणून मागच्या काही दिवसात निवड झालेल्यांबद्दल विचार करावा लागेल, असेही परब यांनी सांगितले. (State transport minister Anil Parab warning st worker regarding salary hike)
संबंधित बातम्या
