Sanjay Dina Patil: बाप फुटला, मुलगी का फुटली नाही? मोठं कारण आलं समोर, थेट मनसेच्या नेत्याचा दावा; संजय दिना पाटलांची वेगळी चाल?

Sanjay Patil-Rajol Patil Shiv Sena: उद्धव सेनेला सहा खासदारांनी सुरूंग लावला. दुसर्‍यांदा उद्धव सेना फुटली. सहा खासदारांनी स्वतंत्र गट स्थापनेनंतर शिंदे सेनेत विलिनीकरणाचा निर्णय घेतला. मुंबईतील खासदार संजय दिना पाटील यांनी शिंदे सेना जवळ केली असली तरी त्यांची मुलगी आणि नगरसेविका राजुल पाटील या मात्र वडीलांसोबत शिंदे सेनेत गेल्या नाहीत. त्या का फुटल्या नाहीत, याविषयी मनसे नेते यशवंत किल्लेदार यांनी मोठा दावा केला आहे. त्यांनी गोटातील बातमी दिली आहे. काय आहे किल्लेदार यांचा दावा?

राजुल पाटील यांना दिलेली जागा चुकीचीच

खासदार फुटीनंतर मनसेतूनही महापालिका निवडणूकीत झालेल्या जागावाटपावरुन नाराजीचा सूर आळवला. संजय दिना पाटील यांची मुलगी राजुल पाटील यांना महापालिका निवडणूकीत भांडुपला दिलेली जागा ही चूकीचीच ठरल्याचा सूर मनसेच्या बैठकीत समोर आला. ती जागा मनसेचीच होती. मनसेकडून अनिषा माजगांवकर निवडून आल्या असत्या असा दावा पक्षाने केला आहे.

महापालिकेत ऑपरेशन टायगर नाही

दर महिन्याला मनसे नगरसेवकांची आढावा बैठक होते. मनसेचा ठसा महापालिका कामकाजात दिसला पाहिजे. विरोधी पक्षांना अल्प निधी दिला जात आहे. सगळे प्रश्न उभे असतांना तोडफोड राजकारण सुरू आहे. मात्र महापालिकेत ऑपरेशन टायगर होणार असल्याचा खोटा दावा केला जातोय; असं आजिबात वातावरण नाही. महापालिकेत असा प्रयत्न केला गेला तरी यशस्वी होणार नाही. खासदारांमुळे आत्मविश्वास वाढला असला तरी महापालिकेत यश मिळणार नाही, असा दावा यशवंत किल्लेदार यांनी केला.

राजुल पाटील शिंदे सेनेत का गेल्या नाहीत?

मुंबई महापालिका निवडणुकीवेळी खासदार संजय दिना पाटलांनी स्वत:च्या मुलीसाठी या जागेचा मुद्दा प्रतिष्ठेचा केला. संजय दिना पाटील खोटं बोलत आहेत, असे मनसे नेते यशवंत किल्लेदार म्हणाले. आता वडीलांच्या पाठोपाठ राजुल पाटील जर एकट्या बाहेर पडल्या तर त्या अपात्र ठरतील. त्यामुळेच त्या वडीलांच्या पाठोपाठ शिंदे शिवसेनेत गेल्या नसल्याचा दावा यशवंत किल्लेदार यांनी केला. जिथे संजय दिना पाटलांची मुलगी राजोल पाटील निवडून आल्या ती जागा आमचीच होती. अनिषा माजगांवकर जर अपक्ष राहून चांगली मतं घेतात तर त्या ठिकाणी नक्कीच निवडून आल्या असत्या, असा दावा किल्लेदार यांनी केला आहे.