Uddhav- Raj Thackeray: निवडणूक आयुक्तांविरोधात आज एल्गार , मेट्रो सिनेमा ते महापालिका धडक मोर्चा, उद्धव आणि राज ठाकरे काय करणार ‘गर्जना’?

Uddhav Thackeray Raj Thackeray Garjana Morcha Today: केंद्रीय निवडणूक आयोग आणि मुख्य निवडणूक आयुक्त ज्ञानेश कुमार यांच्याविरोधात आज महामोर्चा निघणार आहे. मनसे अध्यक्ष राज ठाकरे आणि सेना प्रमुख उद्धव ठाकरे हे पुन्हा एकत्र आले आहेत. मेट्रो सिनेमा ते महापालिका असा मोर्चा धडकणार आहे. सकाळी 10 वाजता या मोर्चासाठी कार्यकर्ते, नागरीक जमा होण्यास सुरुवात करतील. तर साधारणपणे 11 वाजता मोर्चाला सुरूवात होण्याची शक्यता आहे. आज उद्धव ठाकरे आणि राज ठाकरे त्यांच्याविरोधात काय गर्जना करणार याकडे देशाचे लक्ष लागले आहे.

ज्ञानेश कुमार ठाकरे बंधूंच्या हिटलिस्टवर

केंद्रीय निवडणूक आयोगाचा कारभार, मुख्य निवडणूक आयुक्तांचे कथित वादग्रस्त निर्णयाविरोधात दोन्ही बंधूंनी महाविकास आघाडीसोबत यापूर्वीही एल्गार केला होता. ईव्हीएम मशीनबाबत त्यांचा आक्षेप होता. तर त्याचवेळी निवडणूक याद्यांमध्ये घोळाचाही आरोप करण्यात आला होता. हिंदी भाषेच्या सक्तीनंतर दोन्ही ठाकरे एकत्र आले. त्यानंतर त्यांनी सत्याचा मोर्चा, तिरंगा मोर्चा काढला. आता ठाकरे बंधू यांनी मुख्य निवडणूक आयुक्त ज्ञानेश कुमार यांची हकालपट्टी करण्याच्या मागणीसाठी गर्जना मोर्चाचे आयोजन केले आहे. आज मुंबईत सकाळी गर्जना मोर्चा निघेल. या मोर्चात मनसैनिक, शिवसैनिक, विविध राजकीय पक्षांचे नेते, कार्यकर्ते आणि नागरीक सहभागी होतील. या मोर्चाकडे सगळ्या देशाचे लक्ष लागले आहे.

मोर्चानंतर जाहीर सभा

शिवसेना आणि मनसेने गर्जना मोर्चासाठी मोठी तयारी केली आहे. काल राज ठाकरे यांनी या मोर्चाच्या पार्श्वभूमीवर शिवतीर्थावर मनसे पदाधिकाऱ्यांची बैठकही घेतली होती. तर इकडे उद्धव सेनेने सुद्धा मोर्चाची तयारी केली आहे. सकाळी हा मोर्चा मेट्रो सिनेमापासून निघेल. यापूर्वी तो भायखळा येथून निघणार होता. पण त्याच्या मार्गात बदल करण्यात आला. हा मोर्चा मुंबई महानगरपालिका मुख्यालयाजवळ येईल. या ठिकाणी या मोर्चाचे जाहीर सभेत रुपांतर होईल. उद्धव ठाकरे, राज ठाकरे यांच्यासह इतर नेते मोर्चात काय गर्जना करतात याकडे सगळ्यांचे लक्ष लागले आहे.

गर्जना मोर्चाच्या बॅनरची चर्चा

राज ठाकरे व उद्धव ठाकरे यांच्या एकत्रित आंदोलनाचे दादरसह मुंबईत ठिकठिकाणी बॅनर लागले आहेत. आज निवडणूक आयोगाच्या विरोधात राज ठाकरे उद्धव ठाकरे यांनी आंदोलन पुकारलेले आहे. याच आंदोलनासाठी नागरिकांना एकत्रित येण्यासाठी शहरात बॅनरबाजी करण्यात आली आहे. गर्जना लोकशाही व संविधान वाचवण्यासाठी असा उल्लेख या बॅनर वरती करण्यात आलेला आहे.