नड्डाजी नड्डा संभल के रखो, उद्धव ठाकरे यांची भाजप अध्यक्षांवर खोचक टीका

शिवसेनेच्या 58 व्या वर्धापन दिनाचा ठाकरे गटाचा कार्यक्रमात षण्मुखानंद हॉलमध्ये पार पडला. यावेळी ठाकरे गटाचे प्रमुख उद्धव ठाकरे यांनी आक्रमक अंदाजामध्ये भाषण करत पंतप्रधान मोदी, केंद्रीय गृहमंत्री अमित शहा यांच्यासह भाजपवर निशाणा साधला. भाजपचे राष्ट्रीय अध्यक्ष जे. पी. नड्डा यांच्यावर ठाकरेंनी खोचक टीका केली. नेशन वॉन्टस् टू नो, पुछता है भारत. आता पुसता है भारत. भारत त्यांना पुसून टाकत आहे. फक्त भाजपच शिल्लक राहिल असं नड्डा म्हणालेले. नड्डाजी नड्डा संभल के रखो. या देशात शिवसेना संपवण्याचे प्रयत्न प्रत्येक वेळी झाले. शिवसेना त्यांना पुरुन उरल्याचं उद्धव ठाकरे म्हणाले.

चंद्राबाबू आणि नितीशकुमार यांच्याशी झालेली युती नैसर्गिक आहे का. मी म्हणतो भाजपमुक्त राम पाहिजे. तो मिळाला. नितीश कुमार म्हणाले होते, संघ मुक्त भारत. त्यांच्यासोबत मानाचं पान घेऊन बसले होते. मोदी चंद्राबाबूंना यूटर्न बाबू म्हणाले होते. चंद्राबाबू म्हणाले होते मोदींना अतिरेकी. मांझी म्हणाले होते राम काल्पनिक आहे. त्यांच्यासोबत हे बसले. अशा लोकांना घेऊन तुम्ही मला हिंदुत्व शिकवत आहात. माझ्या आजोबांनी आणि वडिलांनी हिंदुत्व शिकवलं आहे. मला तुमचं हिंदुत्व मानणारं नाही. शेंडी जानव्याचं हिंदुत्व मान्य नाही. अतिरेक्यांना बडवणारा हिंदू पाहिजे. तुम्ही आम्हाला शिकवण्याच्या फंदात पडू नका. तुम्ही सत्तेसाठी हिंदुत्व सोडलं? का तुम्ही लाचार झाला, असा सवाल उद्धव ठाकरे यांनी केला.

पदवीधर आणि शिक्षक आपण लढत आहोत- उद्धव ठाकरे

पदवीधर आणि शिक्षक आपण लढत आहोत. आपल्या मुंबईत आणि नाशिकमध्ये विजय पाहिजे. लढाई लढायची आहे. लढाई सुरू झाली आहे. 11 विधान परिषदेच्या जागांची निवडणूक सुरू झाली आहे. आमदार ते निवडून देणार आहे. कोर्टाला विनंती आहे. ही निवडणूक होईल का. अपात्रतेची टांगती तलवार असताना निवडणूक कशी होऊ शकते. निवडणूक प्रक्रिया सुरू झाली असं म्हणतील ही प्रक्रिया सुरूच कशी झाली. अपात्र आमदार मतदान करूच कसे शकतात, असं ठाकरे म्हणाले.