सुटीचा आनंद घेण्यासाठी फिरायला गेले, तरुणाची ही सुटी शेवटची ठरली

नांदेड : देशात स्वातंत्र्यदिनानिमित्त आनंदाचे वातावरण होते. ध्वजारोहण करून बरेच लोकं हे बाहेर फिरायला गेले होते. पर्यटनस्थळांवर गर्दी झाली होती. काही लोकांनी रस्त्यावर आनंद व्यक्त केला. काही तरुण दुचाकी चालवून तिरंगा हातात घेऊन फिरत होते. यामुळे काही ठिकाणी दुर्घटनासुद्धा घडल्या. अशीच एक दुर्घटना नांदेडमध्ये (Nanded) घडली. काही मित्र दुचाकीने फिरायला गेले होते. फिरण्याच्या नादात एका युवकाने दुचाकी थेच कारवर चालवली. यात दुचाकी तसेच कारचे मोठे नुकसान झाले. शिवाय युवकाचा जागीच मृत्यू झाला.

दुचाकी कारवर आदळली

स्वातंत्र्य दिनाची सुट्टी असल्याने आठ ते दहा दुचाकीवरुन काही मित्र फिरायला निघाले होते. त्यातील एकाची भरधाव दुचाकी कारवर आदळली. यात एका युवकाचा मृत्यू झाला. आज दुपारी नांदेड शहरातील पश्चिम वळण रस्त्यावरील पुलावर ही घटना घडली. 26 वर्षीय रोहित मुदिराज असं मृत तरुणाचं नाव आहे.

रोहित काँग्रेस पदाधिकाऱ्याचा मुलगा

रोहित हा भरधाव वेगाने दुचाकी चालवत होता. यावेळी समोरून येणाऱ्या कारला दुचाकी धडकली. डोक्याला मार लागल्याने त्याचा जागीच मृत्यू झाला. अपघात एवढं भीषण होतं की कारचा आणि दुचाकीचा काही भाग चुराडा झाला होता. मयत रोहित मुदिराज हा काँग्रेस पदाधिकारी व्यकंट मुदिराज यांचा मुलगा होता. तसेच माजी नगरसेविकेचा नातू होता. स्वातंत्र्यदिनानिमित्त आनंदाचे वातावरण होते. परंतु, दुर्घटना घडल्यामुळे आनंदावर विरजण पडले. रोहितसारखा तरणाताठा युवक गेला. त्यामुळे सुटीचा आनंद व्यवस्थित घेणे गरजेचे आहे.

भाजपातर्फे इंदापूरमध्ये तिरंगा बाईक रॅली

भाजपच्या वतीने इंदापूरमध्ये आज इंदापूर शहरातून तिरंगा बाईक रॅली काढण्यात आली. भारतीय स्वातंत्र्य दिनाच्या दिनी हर घर तिरंगा अभियानांतर्गत रॅली काढण्यात आली. भारतीय जनता पक्षाचे नेते आणि माजी मंत्री हर्षवर्धन पाटील यांच्या नेतृत्वाखाली रॅली निघाली होती. विशेष बाब म्हणजे या रॅलीमध्ये असंख्य युवकांचा समावेश होता. रॅलीच्या माध्यमातून माजी मंत्री हर्षवर्धन पाटील यांचे शक्तिप्रदर्शन केले असल्याचे बोलले जात आहे.