Nashik Water | नाशिकमध्ये आज पाणी नाही, पंपिंग स्टेशनमध्ये दुरुस्ती; कधी सुरळीत होणार पुरवठा?
नाशिकमध्ये गुरुवारी गंगापूर धरण रॉ. वॉटर पंपिंग स्टेशन व मुकणे धरण रॉ. वॉटर पंपिंग स्टेशनच्या मुख्य जलवाहिनीची दुरुस्ती करण्यात येणार आहे.
नाशिकः नाशिककरांसाठी एक अतिशय महत्त्वाची बातमी. शहरामध्ये आज पाणीपुरवठा (water supply) होणार नसल्याने नागरिकांना निर्जळीला सामोरे जावे लागेल. शिवाय शुक्रवारीही कमी दाबाने पाणीपुरवठा होणार आहे. त्यामुळे दोन दिवसांच्या पाण्याचे नियोजन करून ठेवा, असे आवाहन महापालिका प्रशासनाच्या वतीने करण्यात आले आहे. सध्या गंगापूर आणि मुकणे धरणाच्या पंपिंग स्टेशनमध्ये दुरुस्तीचे काम काढण्यात आले आहे. त्यासाठी हा पाणीपुरवठा बंद ठेवण्यात येणार आहे.
उद्या कमी दाबाने पुरवठा
नाशिकमध्ये गुरुवारी गंगापूर धरण रॉ. वॉटर पंपिंग स्टेशन व मुकणे धरण रॉ. वॉटर पंपिंग स्टेशनच्या मुख्य जलवाहिनीची दुरुस्ती करण्यात येणार आहे. मीटरिंग क्बुबिकल, एचटी व एलटी ट्रान्सफॉर्मर यासह विविध उपकरणे बदलण्यात येणार असल्याचे महापालिकेच्या वतीने सांगण्यात आले आहे. सोबतच मुकळे धरण विल्होळी जलशुद्धीकरण केंद्रातून जाणाऱ्या जलवाहिनीची दुरुस्ती करण्यात येणार आहे. या कामासाठी सकाळी 9 ते सायंकाळी 5 या काळात पाणीपुरवठा बंद ठेवण्यात येणार आहे. त्यामुळे शुक्रवारी सकाळी 21 जानेवारी रोजीही कमी दाबाने पाणीपुरवठा होईल. त्यानंतर शनिवारपासून सुरळीत पाणीपुरवठा सुरू होईल, अशी माहिती महापालिकेच्या पाणीपुरवठा विभागाने दिली आहे.
गावठाणध्ये दिलासा
नाशिकमध्ये पाण्याची काही कमतरता नाही. यंदा तर पावसाने कहर केला. दिवाळीपर्यंत त्याचे थैमान सुरू असल्याचे उभ्या महाराष्ट्राने पाहिले. मात्र, इतके असूनही नाशिक-पंचवटीच्या गावठाण भागामध्ये म्हणजेच जुन्या नाशिकमध्ये नेहमी पाणी टंचाई जाणवते. त्याचे कारण म्हणजे इथे चोवीस तास पाणीपुरवठा होत नाही. हे पाहता महापालिका आयुक्त कैलास जाधव सक्रिय झाले आहेत. त्यांनी या भागाला पाणीपुरवठा करण्यासाठी स्काडाचा प्रयोग राबविण्याची निर्णय घेतल्याचे समजते. या प्रयोगाने गावठाणात पाणी मोजणीचा मार्गही मोकळा होणार आहे.
स्काडा सिस्टीम राबवणार
नाशिक-पंचवटी गावठाणात पाणीपुरवठा करण्यासाठी असलेली योजना रद्द करण्यात आली आहे. आता नव्या वर्षात स्काडा पद्धती आणण्यासाठी आयुक्तांनी पावले उचलली आहेत. त्यामुळे धरणातून थेट पाण्याच्या टाकीपर्यंत जाणाऱ्या पाण्याची मोजणी करणे सोपे होणार आहे. खरेतर पाण्याची अचूक मोजणी करण्यासाठी म्हणूनच स्काडा सिस्टीमसाठी दोन वर्षांपूर्वी निविदा काढली. मात्र, त्यातील अटी, शर्थीत अनेक बदल झाले. हे सारे संशयास्पद वाटल्याने त्या निविदा रद्द करण्यात आल्या. आता त्यानंतर पुन्हा एकदा स्काडा सिस्टीम राबवण्यात येणार आहे. त्याचा फायदा नाशिक आणि पंचवटी गावठाणाला होऊन तिथे चोवीस तास पाणी मिळेल.
इतर बातम्याः
Nashik | लोकशाहीवरील अढळ निष्ठेसाठी विविध कार्यक्रम, जिल्हाधिकाऱ्यांच्या सर्व संस्थांना सूचना काय?
