पवार साहेबांनी उमेदवार द्यावा की नाही, हा…; सुनील तटकरे स्पष्टच बोलले, अर्थखात्याबाबतही मोठं वक्तव्य

मराठवाडा पदवीधर मतदारसंघाच्या निवडणुकीच्या पार्श्वभूमीवर राष्ट्रवादी काँग्रेसच्या दोन्ही गटांमधील लढत चर्चेत आली आहे. शरद पवार यांच्या राष्ट्रवादी काँग्रेसकडून डॉ. प्रतापसिंह पाटील, तर अजित पवार यांच्या राष्ट्रवादी काँग्रेसकडून सतीश चव्हाण निवडणुकीच्या मैदानात आहेत. या लढतीवर अजित पवारांच्या राष्ट्रवादी काँग्रेसचे नेते सुनील तटकरे यांनी भाष्य केले आहे. पवार साहेबांनी कोणता उमेदवार द्यायचा, हा त्यांचा प्रश्न आहे. आम्ही आमच्या ताकदीवर निवडणूक लढू,” अशी भूमिका सुनिल तटकरेंनी स्पष्ट केली आहे.

राष्ट्रवादी विरुद्ध राष्ट्रवादी अशी लढत यापूर्वी विधानसभेच्या निवडणुकीतही झाली होती. त्यावेळी अजित पवार यांच्या मार्गदर्शनाखाली पक्षाला प्रचंड यश मिळाल्याचे सुनिल तटकरे यांनी सांगितले. आता सुनेत्रा पवार यांच्या मार्गदर्शनाखाली विधान परिषदेच्या जागाही जिंकू, असा विश्वास त्यांनी व्यक्त केला. त्यामुळे मराठवाडा पदवीधर मतदारसंघातील दोन्ही राष्ट्रवादींच्या उमेदवारांमधील लढतीकडे राजकीय वर्तुळाचे लक्ष लागले आहे.

सुनील तटकरे आज पदवीधर मतदारसंघातील राष्ट्रवादी काँग्रेसचे उमेदवार सतीश चव्हाण यांच्या प्रचारासाठी धाराशिव जिल्ह्याच्या दौऱ्यावर आहेत. या दौऱ्यादरम्यान त्यांनी पक्षाची भूमिका मांडतानाच शेतकऱ्यांच्या प्रश्नावरही भाष्य केले. शेतकऱ्यांना देण्यात येणाऱ्या पाच हजार रुपयांच्या अग्रीम रकमेच्या मुद्द्यावरून शेतकऱ्यांमध्ये तीव्र नाराजी असल्याचे तटकरे यांनी सांगितले. या विषयावर आपण मुख्यमंत्री देवेंद्र फडणवीस यांची भेट घेऊन चर्चा करणार असल्याचे त्यांनी स्पष्ट केले.

अजित पवार अर्थमंत्री असताना आपत्कालीन मदतीसंदर्भात काही निर्णय घेण्यात आले होते, याचीही त्यांनी आठवण करून दिली. सध्या अर्थखाते मुख्यमंत्री देवेंद्र फडणवीस यांच्याकडे आहे. मात्र अर्थखाते राष्ट्रवादी काँग्रेसला मिळावे, अशी पक्षाची मागणी असल्याचेही तटकरे यांनी सांगितले. त्यामुळे एका बाजूला पदवीधर मतदारसंघातील निवडणुकीची रणधुमाळी सुरू असताना दुसरीकडे शेतकऱ्यांच्या अग्रीम रकमेचा प्रश्न आणि अर्थखात्याच्या मागणीवरून राजकीय घडामोडींना महत्त्व प्राप्त झाले आहे.