ओमराजे निंबाळकर यांनी उद्धव ठाकरेंची साथ सोडली, पण अजूनही मन तिथेच, थेट सोशल मीडियावर..

देवदर्शन करून खासदार ओमराजे निंबाळकर धाराशिवकडे रवाना होणार आहेत. आज उद्धव ठाकरे यांचा धाराशिव दाैरा आहे. ओमराजे निंबाळकर यांनी उद्धव ठाकरे यांची साथ सोडल्यानंतर पहिल्यांदाच उद्धव ठाकरे धाराशिवमध्ये दाखल होत आहेत. विशेष म्हणजे यादरम्यान ओमराजे निंबाळकर देखील धाराशिवमध्येच असणार आहेत. बालाजी तिरुपती आणि शनिशिंगणापूर येथे देवदर्शन करून खासदार ओमराजे निंबाळकर धाराशिवमध्ये दाखल होणार असल्याची माहिती आहे. मतदारसंघात परतल्यानंतर ते पदाधिकारी आणि कार्यकर्त्यांशी संवाद साधणार असून पुढील राजकीय घडामोडींच्या पार्श्वभूमीवर या बैठकीकडे सर्वांचे लक्ष लागले आहे. दोन्ही नेत्यांच्या हालचालींमुळे आज धाराशिवच्या राजकारणात महत्त्वाच्या घडामोडी घडण्याची शक्यता आहे.

6 खासदारांसोबतच धाराशिवचे खासदार ओमराजे निंबाळकर यांनी मोठी बंडखोरी केली. ओमराजे निंबाळकर उद्धव ठाकरेंच्या अत्यंत जवळ असल्याचे सांगितले जायचे. मात्र, अचानक त्यांनी उद्धव ठाकरेंची साथ सोडत एकनाथ शिंदे यांचा हात पकडला. पण ओमराजे निंबाळकर अजूनही उद्धव ठाकरे आणि आदित्य ठाकरे यांच्या फॉलोअर्समध्ये आहेत.

शिवसेना उद्धव बाळासाहेब ठाकरे गट सोडून शिंदे गटात प्रवेश केल्यानंतर राज्यभर राजकीय आरोप-प्रत्यारोप सुरू असताना, खासदार ओमराजे निंबाळकर यांच्या सोशल मीडिया हालचालींचीही चर्चा रंगली आहे. उद्धव ठाकरे यांच्या शिवसेनेतील अनेक पदाधिकारी आणि कार्यकर्त्यांनी ओमराजे निंबाळकर यांना सोशल मीडियावर अनफॉलो केल्याची चर्चा आहे. यादरम्यानच ओमराजे निंबाळकर मात्र, अजूनही उद्धव ठाकरे आणि आदित्य ठाकरे यांच्या अधिकृत सोशल मीडिया खात्यांना फॉलो करत असल्याचे दिसून येत आहे.

राजकीय वाटा वेगळ्या झाल्या असल्यातरी सोशल मीडियावरील हे फॉलो नाते कायम असल्याचे दिसत आहे. दरम्यान आज खासदार ओमराजे निंबाळकर यांच्या लोकसभा मतदारसंघात धाराशिवमध्ये उद्धव ठाकरे यांची सभा आहे. या सभेत उद्धव ठाकरे यांच्याकडून ओमराजे निंबाळकर यांच्यावर नक्की काय टीका केली जाते हे पाहण्यासारखे ठरणार आहे. ओमराजे निंबाळकर यांनी उद्धव ठाकरेंची साथ सोडल्यानंतर उद्धव ठाकरेंनी जोरदार टीका निंबाळकर यांच्यावर केली आहे.