दीक्षाभूमीवर धम्मचक्र अनुवर्तन सोहळा, बाबासाहेब आंबेडकरांनी दिली होती अनुयायांना धम्माची दीक्षा

नीलेश डाहाट, Tv9 मराठी, प्रतिनिधी, चंद्रपूर : चंद्रपूरच्या दीक्षाभुमी येथे धम्मचक्र अनुवर्तनदिन अतिशय उत्साहाने साजरा करण्यात येतो. यावर्षीसुध्दा 15 आणि 16 ऑक्टोबर रोजी या कार्यक्रमाचे आयोजन करण्यात आले आहे. धम्मचक्र अनुवर्तन दिनाच्या नियोजनाबाबत प्रशासन प्रमुखांनी प्रत्यक्ष दीक्षाभुमीस्थळी आढावा घेतला. कोरोनाच्या निर्बंधामुळे गत दोन वर्षात धम्मचक्र अनुप्रवर्तनाचा कार्यक्रम साजरा करता आला नाही.

या कार्यक्रमाच्या आयोजनासाठी चंद्रपूर महापालिकेने परिसराची स्वच्छता, विद्युत व्यवस्था, पथदिवे, मोबाईल टॉयलेटची उपलब्धता करून दिली. महत्वाच्या पुतळ्यांची साफसफाई, परिसरात अग्निशमन दल, वैद्यकीय पथक तैनात ठेवणे, तसेच तात्पुरत्या स्वरुपात असलेले रस्त्यावरील अतिक्रमण काढणे आदीबाबत जय्यत तयारी केली आहे.

पार्किंगसाठी नेहमीच्या जागांव्यतिरिक्त पर्यायी जागांचा शोध, शहरात प्रवेश करणा-या रस्त्यांवर पार्किंग दिशादर्शक फलक लावणे, वाहतूक व्यवस्था व रॅलीच्या मार्गाबाबत जनजागृती करण्यासाठी सूचना देण्यात आल्यात.

महावितरण कंपनीने या दरम्यान विद्युत पुरवठा खंडीत होणार नाही, याची काळजी घेणे तसेच संबंधित विभागांनी आपापल्या जबाबदा-या व्यवस्थितपणे सांभाळणे, अशा सूचना याप्रसंगी देण्यात आल्या.

यावेळी आयोजन समितीच्या वतीने जनरेटरची व्यवस्था, दीक्षाभुमी येथे कायमस्वरूपी हायमास्ट, मान्यवरांसाठी विश्रामगृहाची उपलब्धता, स्टॉलकरिता पुरेशी जागा, एसटी बसची उपलब्धता आदी मागण्या करण्यात आल्या.

यंदाच्या सोहळ्यात डॉक्टर बाबासाहेब आंबेडकरांच्या अस्थिकलशाची यात्रा, 16 ऑक्टोबर रोजीचा मुख्य कार्यक्रम तर बुद्ध धम्म गीतांचा सांस्कृतिक कार्यक्रम ही आकर्षणे असणार आहेत. अशी माहिती डॉ. बाबासाहेब आंबेडकर मेमोरियल सोसायटीचे अध्यक्ष अशोक घोटेकर यांनी दिली.