Thackeray Brother Alliance : उद्धव ठाकरेंच्या एका निर्णयामुळे राज ठाकरेंना मोठा झटका, युतीत मिठाचा खडा पडला

मुंबई महापालिकेच्या निवडणूक निकालानंतर अवघ्या महिन्याभरात ठाकरे बंधुंच्या युतीमध्ये दुरावा दिसू लागला आहे. यामागे काही कारणं आहेत. आता ठाकरे बंधुंच्या युतीत मिठाचा खडा पडलाय का? अशी चिन्हं दिसू लागली आहेत, चर्चा आहे. याचं प्रमुख कारण आहे, मुंबई महापालिकेवर होणारी स्वीकृत नगरसेवकांची निवड. मुंबई महानगरपालिका निवडणुकीत उद्धव ठाकरे यांच्या गटाचे 65 नगरसेवक निवडून आलेत. त्यानुसार उद्धव ठाकरे गटाला तीन स्वीकृत नगरसेवक मिळणार आहे. मुंबई महापालिकेची निवडणूक उद्धव ठाकरे यांनी मनसेसोबत युती करुन लढवली होती. त्यामुळे एक स्वीकृत नगरसेवक पद मनसेला मिळेल अशी चर्चा होती.

पण जी माहिती मिळतेय त्यानुसार मुंबई महापालिकेत तिन्ही स्वीकृत नगरसेवक उद्धव ठाकरे गटाचेच असणार आहेत. उद्धव ठाकरे यांनी महापालिकेतील गट नेत्याच्या माध्यमातून या तीन स्वीकृत नगरसेवकांची नाव महापौरांना कळवली आहेत. साईनाथ दुर्गे, कैलास पाठक आणि माधवी मांजरेकर अशी ही तिन्ही नाव आहे. त्यामुळे मनसेला उद्धव ठाकरे गट स्वीकृत नगरसेवक पद सोडणार नाही हे स्पष्ट आहे. त्यामुळेच ठाकरे बंधुंच्या युतीत मिठाचा खडा पडल्याची चर्चा रंगली आहे.

भेटीचे पडसाद उमटले

महापालिका निवडणुकीत राज ठाकरे यांच्या भाषणाचा फायदा उद्धव ठाकरे यांच्या पक्षाला झाला. त्यांचे 65 नगरसेवक निवडून आले. पण मनसेला विशेष फायदा झाला नाही. त्यांचे फक्त सहा नगरसेवक निवडून आले. राज ठाकरे यांच्या महाराष्ट्र नवनिर्माण सेनेने कल्याण-डोंबिवली महापालिकेत एकनाथ शिंदे यांच्या शिवसेनेला पाठिंबा दिला. नाशिकमध्ये मनसेने शिंदे यांच्या शिवसेनेला साथ दिली. नुकतीच राज ठाकरे यांनी एकनाथ शिंदे यांची भेट घेतली. या घडामोडींचे पडसाद ठाकरे बंधुंच्या युतीमध्ये उमटले आहेत.

एकत्र युतीमध्ये

मागच्या महिन्यात मुंबई महापालिका निवडणुकीचे निकाल जाहीर झाले. मनसे, उद्धव ठाकरे शिवसेना आणि शरद पवार यांच्या राष्ट्रवादी काँग्रेसने मुंबईत एकत्र येत निवडणूक लढवली होती. मुंबई महापालिकेत भाजपचा महापौर आहे. भाजप आणि एकनाथ शिंदे यांची शिवसेना एकत्र युतीमध्ये आहे.