भाजप माझ्या बापाचा पक्ष : पंकजा मुंडे

बीड : कोणी म्हणतं ही माझ्या बापाची जागा आहे, तसा भाजप माझ्या बापाचा पक्ष आहे, असं सांगत भाजप नेत्या पंकजा मुंडे यांनी आपण बंडखोरी करणार असल्याच्या चर्चा उडवून लावल्या. भाजपचे दिवंगत नेते गोपीनाथ मुंडे यांच्या जयंतीनिमित्त गोपीनाथगडावर आयोजित कार्यक्रमात पंकजा मुंडे (Pankaja Munde Gopinath Gad Speech) यांनी समर्थकांशी संवाद साधत जोरदार भाषण केलं.

पक्ष कुणाचा नसतो. स्वतः मोदीजीही सांगतील पक्ष माझा नाही. ते पक्षाचे सेवक आहेत. मी काय या कमळाच्या फुलावर (गोपीनाथ गडावरील कमळाची भव्य प्रतिकृती) बुलडोझर टाकू का? माझा पक्ष आहे. कोणी म्हणतं ना ही माझ्या बापाची जागा आहे, माझ्या बापाचं घर आहे, हा माझ्या बापाचा पक्ष आहे, असं पंकजा मुंडे म्हणाल्या.

चूक असेल, तर कान धरुन सांगितलं पाहिजे. पण क्षमता असायला हवी. सत्ता असताना कार्यकर्त्यांचे लाड करायची संधी असते. पण स्वतःला विचाराचे कुबेर समजणारे लोक माझ्यावर तोंडसुख घेत होते. शेवटच्या दिवसापर्यंत भाजपचा प्रत्येक आमदार निवडून यावा यासाठी मी प्रयत्न करत होते. मी पडले, त्याचं कारण इतिहासात शोधू. पण मी बंड करणार अशी पुडी कोणी सोडली? माझी अपेक्षा कोणाकडूनही नाही, त्यामुळे मी नाराज होण्याचा प्रश्नच नाही. तोंडाला झीप लावणाऱ्या नेत्यांनी पक्ष बनत नाही. माझ्या रक्तात गोपीनाथ मुंडेंचे संस्कार आहेत. त्यामुळे मी बंड करणार नाही, असं पंकजा मुंडे यांनी स्पष्ट केलं.

माफ करा चंद्रकांतदादा, मी आज मुक्ती मागतेय : पंकजा मुंडे

मी पक्ष सोडणार नाही, पक्षाला मला काढून टाकायचं असेल, तर पक्षाने ठरवावं, असं म्हणत पंकजा मुंडे यांनी चेंडू भाजपच्या कोर्टात असल्याचं सांगितलं. मी राज्यभर दौरा करणार. मशाल आणि वज्रमूठ हाती धरणार. गोपीनाथ मुंडे प्रतिष्ठानच्या माध्यमातून काम करणार, असं पंकजा मुंडे यांनी यावेळी जाहीर केलं.

आधी टीव्ही लावला तर रोज संजय राऊत दिसायचे. मात्र त्यांनी जे बोलले ते करुन दाखवलं. पण गेले 12 दिवस टीव्ही लावलं की मीच दिसायचे. मी काही न बोलताही माझंच नाव दिसायचं, पंकजाविषयी चांगलं नाही बोललंपाहिजे, यासाठी काही लोकांना नेमलं होतं, असा आरोप पंकजा मुंडेंनी केला. अजित पवार आणि देवेंद्र फडणवीस यांचा शपथविधी सूत्रांनाही कळला नाही. आम्ही डोळे चोळत उठल्यावर शपथविधी झाल्याचं कळलं, कारण सूत्रांचीही मर्यादा असते, असं पंकजा मुंडे (Pankaja Munde Gopinath Gad Speech) म्हणाल्या.

BJP leader Pankaja Munde: I will not leave the party. I will hold day-long huger strike in Aurangabad on 27 January, 2020. https://t.co/56O4cRCf44

— ANI (@ANI) December 12, 2019