Pune rain : पुणे आणि घाट परिसरात 15 ऑगस्टपर्यंत मुसळधार! हवामान विभागाच्या अंदाजानं नुकसानग्रस्तांची चिंता वाढवली
19 ऑगस्टपर्यंतच्या आठवड्यात मध्य महाराष्ट्र, कोकण आणि गोव्यात पाऊस मोठ्या प्रमाणावर राहणार आहे. मराठवाड्याच्या दक्षिण भागात आणि मध्य महाराष्ट्रात 19 ऑगस्टपर्यंत सामान्य पाऊस पडण्याची शक्यता आहे.
पुणे : पुण्यात जोरदार पाऊस (Pune rain) सुरू असून येत्या काही दिवसांत शहरात हलका ते मध्यम पाऊस पडण्याची शक्यता आहे. हवामान विभागाने हा अंदाज वर्तवला आहे. पुणे जिल्ह्याच्या आसपासच्या घाटमाथ्याच्या भागात 15 ऑगस्टपर्यंत अत्यंत मुसळधार पाऊस पडण्याची शक्यता आहे, असे भारतीय हवामान अंदाज विभागाचे प्रमुख अनुपम कश्यपी (Anupam Kashyapi) यांनी सांगितले आहे. आयएमडीने शुक्रवारी जारी केलेल्या विस्तारित श्रेणीच्या अंदाजानुसार, 19 ऑगस्टपर्यंत महाराष्ट्राच्या बहुतांश भागात पाऊस सामान्य राहण्याची शक्यता वर्तवण्यात आली आहे. शुक्रवारी ताम्हिणी घाटात 24 तासांत 31.5 सेमी पाऊस झाला. अनुपम कश्यपी यांनी सांगितले, की मान्सूनची (Monsoon) स्थिती दक्षिणेकडे झुकली आहे. पुणे शहरासाठी आम्ही 15 ऑगस्टपर्यंत हलका ते मध्यम पाऊस पडणार असल्याचा अंदाज जारी केला आहे.
‘यलो अलर्ट फक्त घाट क्षेत्रांसाठी’
पुणे परिसरातील घाटमाथ्याच्या क्षेत्रांमध्ये मुसळधार पाऊस पडणार आहे. यलो अलर्ट फक्त घाट क्षेत्रांसाठी आहे, असे कश्यपी म्हणाले. विस्तारित श्रेणीच्या अंदाजाबाबत बोलताना, कश्यपी म्हणाले, की 19 ऑगस्टपर्यंतच्या आठवड्यात मध्य महाराष्ट्र, कोकण आणि गोव्यात पाऊस मोठ्या प्रमाणावर राहणार आहे. मराठवाड्याच्या दक्षिण भागात आणि मध्य महाराष्ट्रात 19 ऑगस्टपर्यंत सामान्य पाऊस पडण्याची शक्यता आहे. तर इतर भागांमध्ये सरासरीपेक्षा जास्त पाऊस पडण्याची शक्यता आहे, असे कश्यपी म्हणाले.
20 ऑगस्ट ते 26 ऑगस्टपर्यंत सामान्य पाऊस
20 ऑगस्ट ते 26 ऑगस्ट दरम्यान असलेल्या दुसऱ्या आठवड्यातही राज्यातील बहुतांश भागात सरासरीपेक्षा जास्त पाऊस पडण्याची शक्यता आहे. कश्यपी म्हणाले, की मध्य महाराष्ट्र आणि मथवाडाच्या अगदी उत्तरेला वगळता, या दोन प्रदेशांमध्ये 20 ऑगस्ट ते 26 ऑगस्टपर्यंत सामान्य पाऊस पडण्याची शक्यता आहे.
आर्थिक नुकसान
सध्या सुरू असलेल्या पावसामुळे पुणे जिल्ह्यात मात्र मोठे नुकसान होताना दिसून येत आहे. मावळ परिसरातील काही नागरिकांच्या घरावरचे छप्पर उडाले. त्यामुळे ऐन पावसाळ्यात संबंधित कुटुंबांची मोठी गैरसोय झाली आहे. अनेक ठिकाणी झाडे, दरडी कोसळण्याच्याही घटना घडत आहेत. येत्या काळात आणखी पाऊस होणार असल्याने नुकसानग्रस्तांची चिंता अधिक वाढली आहे.
