Pune crime : पुण्याच्या कोथरूडमधला गुंड शरद मोहोळ तडीपार; खुनासह दाखल आहेत गंभीर गुन्हे
पुण्यातील कुख्यात गुंड म्हणून शरद मोहोळ याची ओळख आहे. शरद मोहोळ टोळीने सरपंचाचे अपहरण करून खंडणी उकळल्या प्रकरणी पोलिसांनी त्याला अटक केली होती.
पुणे : गुंड शरद मोहोळ (Sharad Mohol) याला पुण्यातून हद्दपार करण्यात आले आहे. कोथरूड भागात दहशत असलेला गुंड शरद मोहोळला तडीपार करण्याच्या प्रस्तावास पोलीस उपायुक्त पौर्णिमा गायकवाड यांनी मंजुरी दिली आहे. शरद हिरामण मोहोळ (वय 38, रा. माऊलीनगर, सुतारदरा, कोथरूड) याच्या विरोधात पुणे शहर, पिंपरी तसेच जिल्ह्यातील ग्रामीण भागात गंभीर स्वरूपाचे गुन्हे दाखल आहेत. शरद मोहोळ आणि साथीदारांनी टोळीयुद्धातून गणेश मारणे टोळीतील पिंटू मारणे याचा खून (Murder) केला होता. नीलायम चित्रपटगृहाजवळ एका हॉटेलमध्ये ही घटना घडली होती. या गुन्ह्यात न्यायालयाने शरद मोहोळ याला जन्मठेपेची शिक्षा सुनावली आहे. या प्रकरणात मुंबई उच्च न्यायालयाने (Bombay high court) मोहोळला गेल्या वर्षी जामीन मंजूर केला होता.
दहशत माजविण्याचे गुन्हे
कारागृहाबाहेर आल्यानंतर शरद मोहोळ आणि त्याच्या साथीदारांनी दहशत माजविण्याचे गुन्हे केले होते. या गुंड मोहोळला शहरातून सहा महिन्यांसाठी तडीपार करण्याचा प्रस्ताव कोथरूड पोलीस ठाण्याचे वरिष्ठ पोलीस निरीक्षक महेंद्र जगताप, गुन्हे शाखेचे पोलीस निरीक्षक बाळासाहेब बडे यांच्या मार्गदर्शनाखाली पोलीस कर्मचारी भास्कर बुचडे, अजय सावंत, अनिल बारड यांनी तयार केला होता. यानंतर परिमंडळ तीनच्या पोलीस उपायुक्त पौर्णिमा गायकवाड यांनी महाराष्ट्र पोलीस अधिनियम 1951चे कलम 57 (1) (अ) (1)मधील तरतुदींनुसार गुन्हेगार शरद मोहोळ याला पुणे शहर, पिंपरी चिंचवड पोलीस आयुक्तालय तसेच पुणे जिल्ह्यातून सहा महिन्यांसाठी तडीपार करण्याबाबतचा प्रस्ताव मंजूर केला आहे.
कोण आहे शरद मोहोळ?
पुण्यातील कुख्यात गुंड म्हणून शरद मोहोळ याची ओळख आहे. शरद मोहोळ टोळीने सरपंचाचे अपहरण करून खंडणी उकळल्या प्रकरणी पोलिसांनी त्याला अटक केली होती. मोहोळ आणि आलोक भालेरावला येरवडा कारागृहातील अंडा सेलमध्ये ठेवण्यात आले होते. त्यावेळी त्यांनी दहशतवादी कातिल सिद्दीकी याचा नाडीने गळा आवळून खून केला होता. या खटल्यातून त्यांची पुराव्याअभावी निर्दोष मुक्तता करण्यात आली आहे. सध्या तो जामिनावर आहे.
