शिरुर लोकसभेच्या जागेवर महायुतीमधील तिन्ही पक्षांचा दावा, परंतु शिवसेना उमेदवाराकडून बॅनरबाजी

सुनिल थिगळे, शिरुर, पुणे, दि. 17 फेब्रुवारी 2024 | लोकसभा निवडणुकीचे पडघम वाजू लागले आहेत. सर्वच राजकीय पक्षांनी निवडणुकीची तयारी सुरु केली आहे. महायुतीमध्ये जागा वाटपाची चर्चा सुरु झाली आहे. पुणे, बारामती आणि शिरूर लोकसभेकडे संपूर्ण राज्याचे लक्ष लागले आहे. या तिन्ही जागांवर महायुतीचे तिन्ही पक्ष दावा करत आहेत. परंतु बारामतीची जागा राष्ट्रवादी काँग्रेसला मिळण्याची शक्यता आहे. अजित पवार यांनी शुक्रवारी यासंदर्भात संकेत दिले. शिरुरमध्ये अजित पवार गटाचे दौरे वाढले आहेत. भाजप आपला दावा ठोकत आहे. या जागेचा तिढा सुटण्याआधीच शिवसेनेचे माजी खासदार शिवाजीराव आढळराव पाटील यांनी बॅनरबाजी बाजी सुरु केली आहे.

जनतेच्या मनात अढळ लागले बॅनर

शिरुरमध्ये ‘जनतेच्या मनात अढळ काल आज आणि उद्या’ अशा आशयाचे बॅनर लागले आहेत. शिरूर लोकसभेच्या जागेसाठी राष्ट्रवादी काँगेस आणि भाजप आग्रही असताना शिंदे गटाकडून फ्लेक्स बाजी करण्यात येत आहे. अजित पवार यांनी खासदार अमोल कोल्हे यांच्यासमोर तगडा उमेदवार देण्याचे आव्हान दिले आहे. त्यावेळी शिरूर मतदार संघात उमेदवारी कोणाला मिळणार याकडे सर्वांचे लक्ष लागले आहे. शिवाजीराव अढळरावर यांच्या बॅनरवर महायुतीतील सर्व नेत्यांचे फोटो लावले आहे. आढळराव यांच्या बॅनरमुळे शिरूर लोकसभा मतदार संघात चर्चा होत आहे.

म्हाडाचे अध्यक्षपद निवड पण दावा कायम

मला मंत्री दर्जाचे पद असावा, असे मुख्यमंत्री एकनाथ शिंदे यांना वाटत होते. त्यामुळे आपल्याकडे म्हाडाच्या अध्यक्षपदाची जबाबदारी देण्यात आल्याचे शिवाजीराव आढळराव पाटील यांनी सांगितले. पुणे म्हाडाच्या अध्यक्षपदी निवड झाली असले तरी शिरूर लोकसभेवरचा क्लेम आपण सोडलेला नाही. महायुतीचा शिरूर लोकसभा मतदारसंघाचा उमेदवार मीच असेल आणि मीच निवडून येणार आहे, असे त्यांनी स्पष्ट केले. पुणे म्हाडा नंतर मी लोकसभा निवडणूक लढणार नाही हा गैरसमज आहे.

पवार कुटुंबियांचे दौरे वाढले

उपमुख्यमंत्री अजित पवार यांनी खासदार अमोल कोल्हे यांना शिरूर लोकसभा मतदारसंघात पराभूत करणारच असे आव्हान दिल्यानंतर अजित पवार यांच्या कुटुंबियांकडूनही शिरूर लोकसभा मतदारसंघातील दौरे सध्या वाढू लागले आहेत. अजित पवार यांच्या पत्नी सुनेत्रा पवार यांनी शिरूर लोकसभा मतदारसंघातील शिक्रापूर येथील महिलांच्या हळदी कुंकवाच्या कार्यक्रमात सहभागी झाल्या. खेळ पैठणीचा ही खेळला. यावेळी त्यांनी उपमुख्यमंत्री अजित पवार यांच्यासाठी उखाणा ही घेतला.

पार्थ पवार यांना शिरूरच्या लोकसभा मतदारसंघात निवडणुकीच्या रिंगणात उतरवले जाण्याची ही शक्यता आहे. यामुळे मुलाच्या प्रचारासाठीच सुनेत्रा पवार शिरूर लोकसभा मतदारसंघात फिरत असल्याचे ही बोललं जात आहे.

हे ही वाचा

बारामती लोकसभेसाठी अजित पवार यांचा उमेदवार ठरला ? प्रचाराचा रथ फिरणार