शरद पवारांना पुण्यातील ‘या’ 3 मतदारसंघात मोठं चॅलेंज, राजकीय समीकरणं काय?

चिंचवड आणि भोसरी विधानसभा मतदारसंघात भाजपकडून शंकर जगताप आणि विद्यमान आमदार महेश लांडगे हे रिंगणात आहेत. शंकर जगताप हे निवडणूक पहिल्यांदाच लढवत आहेत. त्यांना अनुभव नसला तरी ते दिवंगत आमदार लक्ष्मण जगताप यांचे बंधू आहेत. 2019 च्या विधानसभा निवडणुकीत दिवंगत लक्ष्मण जगताप यांना 1 लाख 50 हजार 723, अपक्ष राहुल कलाटे यांना 1 लाख 20 हजार 225 मते मिळाली होती. लक्ष्मण जगताप विजयी झाले होते. जगतापांचा अकस्मात निधनानंतर देखील चिंचवड पोटनिवडणुकीत अश्विनी जगतापांना 1 लाख 35 हजार 603, राष्ट्रवादीचे नाना काटे यांना 99 हजार 435 आणि अपक्ष राहुल कलाटे यांना 44 हजार 112 मते मिळाली होती. आश्विनी जगताप या विजयी झाल्या होत्या. सध्या देखील जगताप कुटुंबातील शंकर जगतापांच पारडे जड वाटत आहे, असं राजकीय विश्लेषक सांगतात.

चिंचवड विधानसभा मतदारसंघ नेहमीच भाजपचा बालेकिल्ला मानला जातो. यावेळी बंडखोरीवर देखील बरंच काही अवलंबून असेल. बंडखोर नाना काटे यांनी माघार घेतल्यास शंकर जगताप यांना ही निवडणूक जड जाऊ शकते. यामुळेच महाविकास आघाडीचे उमेदवार राहुल कलाटे यांनी विजयाचा विश्वास व्यक्त केलाय. शंकर जगतापांना 100 टक्के विजयाची खात्री आहे.

भोसरी मतदारसंघात चित्र काय?

भोसरी विधानसभा मतदारसंघातील चित्र काही वेगळं नाही. राजकारणात कसलेले पैलवान आमदार महेश लांडगे यांच्या विरोधात शरद पवाराचे शिलेदार अजित गव्हाणे यांच आव्हान असणार आहे. 2019 मध्ये झालेल्या विधानसभा निवडणुकीत महेश लांडगे यांना 1 लाख 59 हजार 295, अपक्ष लढलेले माजी आमदार विलास लांडे यांना 81 हजार 728 मते मिळाली होती. त्यामुळे महेश लांडगे यांचा विजय झाला होता. 2024 चे चित्र काही वेगळं आहे. अनेक राजकीय घडामोडी घडल्याने महेश लांडगे यांना सोपी वाटणारी भोसरी विधानसभा निवडणूक जड जाऊ शकते. तरीही दोन्ही उमेदवारांनी विजयाची खात्री व्यक्त केली आहे.

तीनही मतदारसंघात कुणी-कुणी केलीय बंडखोरी?

भोसरी, चिंचवड आणि पिंपरी या तीनही विधानसभा मतदारसंघातील बंडखोर काय भूमिका घेतात? यावर बरंच काही राजकीय गणित अवलंबून आहे. चिंचवडमधून महायुतीतून नाना काटे यांनी बंडखोरी केली आहे. पिंपरीमधून महाविकास आघाडीतून माजी आमदार गौतम चाबुकस्वार, पिंपरीमधून महायुतीमधून चंद्रकांता सोनकांबळे, तर भोसरीमधून महाविकास आघाडीतून रवी लांडगे यांनी बंडखोरी केली आहे.

पिंपरी विधानसभा मतदारसंघात महायुतीमधून अजित पवारांचे विश्वासू आमदार अण्णा बनसोडे विरुद्ध शरद पवार गटाच्या सुलक्षणा शीलवंत-धर महाविकास आघाडीकडून आव्हान देणार आहेत. त्या पहिल्यांदाच निवडणूक लढत आहेत. उच्चशिक्षित चेहरा म्हणून त्यांच्याकडे पाहिलं जातंय. 2019 मध्ये अजित पवारांचे विश्वासू असलेले अण्णा बनसोडे विजयी झाले होते. त्यांना 86 हजार 985 मते मिळाली होती. तर शिवसेनेच्या गौतम चाबुकस्वार यांना 61 हजार 177 मते मिळाली होती. यावेळी पिंपरी विधानसभा मतदारसंघातून महायुतीमधूनच अण्णा बनसोडे यांना तीव्र विरोध झाला होता. या नाराजीचा फटका देखील आमदार अण्णा बनसोडे यांना बसू शकतो.