काम आपण करतो पण ज्ञानेश कुमार यांच्या कृपेने दुसरेच निवडून येतात, जेजुरीमध्ये शर्मिला ठाकरे यांचं मोठं विधान

विक्रम वरे, प्रतिनिधी, टीव्ही 9 मराठी : मुख्य निवडणूक आयुक्त ज्ञानेश कुमार यांच्याविरोधात गेल्या 15 दिवसांपासून देशातील विविध राज्यात मोठी आंदोलनं सुरू आहेत. दिल्ली तर आंदोलनाची रणभूमी ठरली आहे. काँग्रेसने गेल्या दहा दिवसात दिल्ली दणाणून सोडली आहे. तर कॉकरोच जनता पार्टीनेही सरकारला जेरीस आणले आहे. इकडे मुंबईत ठाकरे सेना आणि मनसेही निवडणूक आयोग आणि ज्ञानेश कुमार यांच्याविरोधात मैदानात उतरली आहे. जोपर्यंत निवडणूक आयुक्तांचा राजीनामा होत नाही तोपर्यंत आंदोलनाची धार तीव्रच राहणार असल्याचे काँग्रेस नेते राहुल गांधी यांनी स्पष्ट केले आहे. दरम्यान मनसे प्रमुख राज ठाकरे यांच्या पत्नी शर्मिला ठाकरे यांनी सुद्धा ज्ञानेश कुमार यांच्याविरोधात मोर्चा उघडला आहे. जेजुरीमध्ये मनसे नेत्या शर्मिला ठाकरे यांनी मोठे वक्तव्य केले आहे.

आपण काम करतो पण…

महाराष्ट्र नवनिर्माण सेनेच्या नेत्या शर्मिला ठाकरे यांनी जेजुरी मध्ये बोलताना मुख्य निवडणूक आयुक्त ज्ञानेश कुमार यांच्यावरती भाष्य केलं आहे.“काम आपण करतो, पण ज्ञानेश कुमार यांच्या कृपेने दुसरेच निवडून येतात; आता हे बंद करायचं आहे ” असं विधान शर्मिला ठाकरे यांनी केला आहे. काम करणारे आणि निवडून येणारे यांच्यातील फरक सांगताना शर्मिला ठाकरे यांनी हे भाष्य केलं आहे. शर्मिला ठाकरे या जेजुरी मध्ये एका कार्यकर्त्याच्या दुकानाच्या उद्घाटनाच्या निमित्ताने आल्या होत्या आणि त्यावेळी त्या बोलत होत्या.

जेजुरीच्या खंडेरायाला नवस बोला

खरं काम करणाऱ्या माणसांसाठी आज तुम्ही जेजुरीच्या खंडेरायाला नवस बोला, असेही शर्मिला ठाकरे पदाधिकाऱ्यांसमोर म्हणाल्या. यंदा दुष्काळाचं मोठं संकट आहे. मी रस्त्यावर बघितलं सगळी पीकं जळून गेली आहेत. शेतकऱ्यांच्या ऊसाला देखील भाव मिळत नसल्याची खंत शर्मिला ठाकरे यांनी बोलून दाखवली. त्यांनी हे संकट दूर होण्यासाठी आई अंबेला प्रार्थना करते, असे म्हटले.

दोन दिवसांपूर्वी सीजेपीच्या समर्थनार्थ मोठे आंदोलन

ज्ञानेश कुमार यांच्या राजीनाम्यासाठी दोन दिवसांपूर्वी मुंबईत मोठे आंदोलन पेटले. मुंबईत सीजेपी, उद्धव सेना आणि मनसे कार्यकर्त्यांनी जोरदार आंदोलन केले. त्यात पोलिसांनी अनेकांना ताब्यात घेतले. आंदोलनात आदित्य ठाकरे आणि अमित ठाकरेच नाही तर तेजस ठाकरेही उतरलेले दिसले. शिवाजी पार्कवरील या आंदोलनाने निवडणूक आयोगाविरोधातील वातावरण चांगलेच तापवले.