Bharat Gogawale: रामदास कदम यांच्या भूमिकेमुळेच सुनील तटकरे संसदेत? भरतशेठ गोगावले म्हणाले काय? दोन्ही नेत्यांच्या वादावरही भाष्य

कदमांच्या भूमिकेमुळेच तटकरे संसदेत? भरतशेठ गोगावले म्हणाले काय?

Bharat Gogawale on Ramdas Kadam Sunil Tatkare: दिवंगत अजितदादा पवार यांच्या विमान अपघातामागे सुनील तटकरे यांचा हात असल्याचा आणि त्यांची चौकशी करण्याचा बॉम्ब शिवसेना नेते रामदास कदम यांनी टाकला. त्यानंतर राज्याच्या राजकारणात मोठा भूकंप आला. दादांचा विमान अपघात की घातपात हा गेल्या सहा महिन्यांपासून चर्चेचा विषय आहे. त्यातच कदम यांच्या वक्तव्याने मोठा वाद पेटला. तटकरे यांनी कदमांना कायदेशीर नोटीस बजावणार असल्याचे सांगितले. आता या वादावर रायगडचे पालकमंत्री भरतशेठ गोगावले यांनीही भाष्य केले आहे. त्यांनी तटकरे यांच्या खासदारकीविषयी मोठे वक्तव्य केले आहे.

तटकरे यांच्या नावासाठी कदमांची शिफारस

रामदास कदम आणि सुनील तटकरे यांच्यातील वादावर पालकमंत्री भरत गोगावले यांनी महाड येथे प्रतिक्रिया दिली. रामदास कदम हे आमचे सीनियर नेते आहेत. सुनील तटकरे यांना उमेदवारी द्यावी, यासाठी रामदास कदम यांनीच निवडणुकीत तटकरे यांच्या नावाची शिफारस केली होती. त्यांना निवडून आणण्याची जबाबदारीही घेतली होती. त्याप्रमाणे त्यांना निवडून आणले, असा दावा गोगावले यांनी केला.

दोन्ही नेत्यातील वादावर प्रतिक्रिया

त्यानंतर सुनील तटकरे आणि रामदास कदम यांच्यात नेमके काय झाले, हे आम्हालाही माहीत नाही. माझ्या मते, वरच्या स्तरावर मुख्यमंत्री आणि दोन उपमुख्यमंत्र्यांमध्ये जर ट्युनिंग (समन्वय) चांगले असेल, तर खालच्या स्तरावरही तसा समन्वय असायला हवा, असे वक्तव्य भरतशेठ यांनी केले. रायगडमध्ये शिवसेना आणि राष्ट्रवादीतील कलगीतूरा जुनाच आहे. अगोदर पालकमंत्री पदावरून दोन्ही पक्षात दोन वर्षात मोठा संघर्ष पाहायला मिळाला. तर त्यानंतर दिलजमाई झाली आणि अनिकेत तटकरे हे विधान परिषदेवर बिनविरोध निवडून आले. पण कोकणातील राजकीय शिमगा थांबलेला नाही. त्याचे पडसाद राज्यातही उमटत आहेत. तटकरे आणि गोगावले हा वाद असतानाच त्याला कदम आणि थोरवे असे कांगोरे ही समोर आले आहे. एकंदरीतच तटकरे विरुद्ध आम्ही सारे असा कोकणातील हा सामना या ना त्या कारणांनी राजकीय वस्त्रहरण करतो आणि वादावर पडदा पडता पडता पडता पुन्हा दुसर्‍या वादाचा अंक सुरू होत असल्याचे चित्र आहे.