MPSC पेपरफुटी प्रकरणात मोठी कारवाई; मुख्य आरोपी ऋतुजा पाटील ताब्यात

MPSC च्या औषध निरीक्षक पेपरफुटी प्रकरणात मोठी अपडेट समोर आली आहे. या पेपरफुटी प्रकरणातील मुख्य आरोपी ऋतुजा पाटील हिला नंदुरबारमधून ताब्यात घेण्यात आलं. ऋतुजा हिला ताब्यात घेतल्यानंतर पेपरफुटी प्रकरणातील तपासाला वेग येणार आहे. ऋतुजा पाटील हिला नंदुरबारातील ज्ञानदीप सोसायटीमधील तिच्या राहत्या घरातून ताब्यात घेण्यात आल्याची माहिती समोर आली आहे. मुंबई पोलिसांचे विशेष गुन्हे शाखेचे पथक आज सकाळपासून नंदुरबारमध्ये दाखल झालं होतं. पोलिसांच्या पथकाने नंदुरबारातील विविध ठिकाणी झाडाझडती घेत चौकशी केली. त्यानंतर अखेर ऋतुजा पाटील हिला तिच्या निवासस्थानातून ताब्यात घेण्यात आलं.

ताब्यात घेतल्यानंतर ऋतुजा पाटील हिला मुंबईतील विशेष गुन्हे शाखेच्या पथकाकडून मुंबईमध्ये आणण्यात येणार आहे. पेपर खरेदी केल्याचा आणि नंतर तो प्रियकराला दिल्याचा आरोप ऋतुजा पाटील हिच्यावर आहे. आता ऋतुजाच्या ताब्यामुळे औषध निरीक्षक पेपरफुटी प्रकरणाच्या तपासाला आता आणखी वेग येण्याची शक्यता व्यक्त केली जात आहे.

नेमकं काय घडलं ?

MPSC च्या औषध निरीक्षक पदाच्या पेपरफुटी प्रकरणातील मुख्य आरोपी ऋतुजा पाटील ही अखेर पोलिसांच्या ताब्यात आहे. तिच्या राहत्या घरातून मुंबई पोलिसांनी तिला अटक केली. ऋतुजा पाटील आणि गौरव पाटीलच्या बिनसलेल्या प्रेमप्रकणामुळेच हा पेपरफुटीचा प्रकार उघड झाला. ऋतुजाचे वडील अमृत पाटील यांनी पेपर फोडण्यासाठी प्रवीण पाटील या दलालाची मदत घेतली होती. ऋतुजाच्या हातात तो पेपर आल्यावर तिने प्रेमापोटी तो पेपर गौरव पाटील यालाही दिला. मात्र त्यांचं ब्रेकअप झाल्यावर गौरव पाटील यानेच MPSCकडे तक्रार दाखल केली आणि हा धक्कादायक प्रकार उघडकीस आला.

अनेकांना अटक

या पेपरफुटी प्रकरणात आतापर्यंत सहा जणांना अटक करण्यात आली आहे. त्यामध्ये एमपीएससीचे अवर सचिव अभिजीत लेंडवे यांचाही समावेश आहे. तसेच सहायक कक्ष अधिकारी गोपाळ मराठे आणि विश्वेश्वर नकाते यांनाही पोलिसांनी बेड्या ठोकल्या आहेत. या प्रकरणात परीक्षार्थी ऋतुजा पाटीलचे वडील अमृत पाटील यांनाही अटक करण्यात आली आहे. तर आता ऋतुजा हिलाबी पोलिसांनी ताब्यात घेतलं.