पीएच्या मुलीच्या मृत्यू प्रकरणात महत्त्वाची अपडेट; रोहित पवारांनी दिली पहिली प्रतिक्रिया, बारामतीमधील एका समस्येवर ठेवलं बोट

आमदार रोहित पवार यांच्या पीएच्या मुलीच्या संशयास्पद मृत्यूने एकच खळभळ उडाली आहे. आई-मुलीचे किरकोळ भांडण झाले. त्यानंतर मुलगी रात्री घराबाहेर पडली होती. परंतु तिचा दुसऱ्या दिवशी मृतदेह आढळला. तिची चप्पल एका इमारतीच्या टेरेसवर आढळली आहे. त्यामुळे या प्रकरणात वेगवेगळे तर्क लावले जात आहेत. आता या प्रकरणावर रोहित पवार यांनी पहिली प्रतिक्रिया दिली आहे. त्यांनी आता सांगता येणार नसल्याचे स्पष्ट केले

रोहित पवारांनी ठेवलं बारामतीमधील या समस्येवर बोट

आमदार रोहित पवार यांना दुर्घटनेची माहिती मिळताच त्यांनी बारामती गाठली. त्यानंतर त्यांनी घटनास्थळाची पाहणी केली. या पाहणीनंतर रोहित पवार म्हणाले, ‘आता याच्यात नेमकं खरं काय घडलं, हे सांगता येणार नाही. त्यामुळे या घटनेसाठी पोलीस प्रशासन जबाबदार आहे का, हे आता सांगता येणार नाही. काही वर्षापूर्वी अजितदादांनी स्वत: पाठपुरावा करून बारामती शहरासाठी प्रत्येक कानाकोपऱ्यात सीसीटीव्ही कॅमेरा मंजूर केला होता. या गोष्टीला अनेक वर्ष जाऊन सुद्धा…सीसीटीव्हीचा प्रकल्प गृह विभागाने मंजूर केला नाही. एका इमारतीला सीसीटीव्ही आहेत दुसऱ्या इमारतीला सीसीटीव्ही नाहीत. आसपासच्या विभागात सीसीटीव्ही नसल्याने या तपासाला वेळ लागण्याची शक्यता आहे’.

पोलीस काय म्हणाले?

रोहित पवारांच्या (Rohit Pawar) पीएच्या मुलीच्या मृत्यू प्रकरणावर पोलिसांची देखील पहिली प्रतिक्रिया समोर आली आहे. पोलीस अधिकारी म्हणाले, ‘आता प्रथम दर्शनी नेमकं काय झालं, अद्याप सांगता येणार नाही. पोस्टमार्टम रिपोर्ट येणे बाकी आहे. मुलीला जखमा आहेत. तिचा हात आणि पाय मोडलेला आहे. संबंधित जखमा नेमक्या कशा, या पोस्ट मार्टमनंतर डॉक्टरांशी बोलू. त्यानंतर तपासाला वळण मिळेल. या मुलीची चप्पल टेरेसवर आढळली. त्यामुळे इमारतीवरून तिने उडी मारली का, याचा तपास सुरू आहे’. आता या प्रकरणात पोस्टमार्टम रिपोर्ट येणे बाकी आहे. अवघ्या 12 वर्षांच्या मुलीने खळबळ उडाली असून संपूर्ण बारामतीकरांचं (Baramati) लक्ष या प्रकरणाकडे लागलं आहे.