रोहित पवार माझे मित्र, उद्या माझ्यासोबत मंत्रीही असू शकतात; नितेश राणेंचं खळबळजनक वक्तव्य, MPSC आंदोलनात थेट ऑफर

पुण्यात एमपीएससी विद्यार्थ्यांचं आंदोलन सुरू आहे. आज या आंदोलनाला आमदार नितेश राणेंनी उपस्थिती लावली होती. यावेळी त्यांनी विद्यार्थ्यांसोबत संवाद साधला आहे. यात त्यांनी एक खळबळजनक वक्तव्य केलं आहे. रोहित पवारांचं नाव घेत त्यांनी हे वक्तव्य केलं आहे. यामुळे आता राजकारणात चर्चांना उधाण आले आहे. एमपीएससी विद्यार्थ्यांच्या शिष्टमंडळांना भेटण्यासाठी नितेश राणेंनी उपस्थिती लावली होती.

यावेळी बोलताना नितेश राणे म्हणाले की, आमचा मुख्यमंत्री कोणाविषयी बोलत नाही. पुण्याला आदरणीय पवार साहेबांची पत्रकार परिषद पाहिली. राज्याच्या प्रमुखांसोबत सुसंवाद साधा असं सांगितलं आहे. कुणीही दुसऱ्यांनी हट्ट न करायला पाहिजे. सरकारने विद्यार्थ्यांच्या 13 पैकी 12 मागण्यात मान्य केलेल्या आहेत. मुख्यमंत्री राज्याचे प्रमुख असल्याचे पाहायला मिळत आहे. सगळ्या गोष्टी समितीनुसार होणार आहेत. समितीदेखील हा मुद्दा मांडणार आहे, असं त्यांनी सांगितलं आहे. यानंतर नितेश राणेंनी एक धक्कादायक वक्तव्य केल्याचे पाहायला मिळाले आहे.

ते म्हणाले की, रोहीत पवार माझे मित्र आहेत. त्यांना मी शत्रू मानत नाही. ते कदाचित उद्या माझ्यासोबत सरकारमध्ये मंत्री देखील असू शकतील. वस्तूनिष्ठ बोलला तर तेच होणार आहे. रोहित पवार आपण एकत्र लढू या. एमपीएससी संदर्भात सिस्टिममधील त्रुटी दूर करण्यासाठी आवाज उचलला जातो आहे. एमपीएससीचे वजन वाढण्यासाठी काम करत होतो. राज्य सरकार तुमच्या मनानुसार करत आहे. भारतीय संविधानाची प्रक्रिया पूर्ण करण्याची संधी दिली पाहिजे. मुख्यमंत्र्यांनी तुमची जबाबदारी घेतलेली आहे. आंदोलनावर एक दिवस जल्लोष आणि फटाके फोडाल असा विश्वास तुम्हाला देतो, असं आश्वासन नितेश राणेंनी दिलं आहे.

तर दुसरीकडे संजय राऊतांनीही आज आंदोलनस्थळी भेट दिली आहे. त्यांनी राज्य सरकारवर जोरदार निशाणा साधला आहे. ते म्हणाले की, सरकार खोटं बोलत आहे. मुलं काय मुर्ख आहेत का? जर मागण्या मान्य झाल्या तर फुट का पाडता? सरकारला या प्रकरणात त्यांचे मन शुद्ध नाही आहे. दिल्लीत काय घडले याचा अभ्यास मुख्यमंत्र्यांनी केला पाहिजे. ही आपली पुढची पिढी आहे. सरकार निवडणुका घेत नाही ते स्पर्धा परिक्षा काय घेणार? हे आंदोलन एक होते फडणवीस सरकारने फुट पाडली. फोडा आणी झोडा ही त्यांनी नीती आहे. जी इंग्रजांची नीती आहे, असं म्हणत संजय राऊतांनी जोरदार टीका केली आहे.