VIDEO: अखेर संजय राठोड मंगळवारी सहकुटूंब पोहरादेवीला येणार; राठोड काय बोलणार? याकडे महाराष्ट्राचे लक्ष
पूजा चव्हाण आत्महत्या प्रकरणात आरोप झालेले राज्याचे वन मंत्री संजय राठोड अखेर मंगळवारी सर्वांसमक्ष येणार आहेत. (Sanjay Rathod will present at Poharadevi in washim)
वाशिम: पूजा चव्हाण आत्महत्या प्रकरणात आरोप झालेले राज्याचे वन मंत्री संजय राठोड अखेर मंगळवारी सर्वांसमक्ष येणार आहेत. येत्या मंगळवारी ते वाशिम जिल्ह्यातील पोहरादेवी येथे येऊन देवीचं दर्शन घेणार आहेत. त्यामुळे राठोड यावेळी मीडियाशी बोलणार याकडे संपूर्ण महाराष्ट्राचे लक्ष लागले आहे. (Sanjay Rathod will present at Poharadevi in washim)
पोहरादेवीचे महंत सुनील महाराज यांनी आज प्रसारमाध्यमांशी संवाद साधून ही माहिती दिली. संजय राठोड यांना आम्ही पोहरादेवीला येण्याचं निमंत्रण दिलं होतं. यांच्या कार्यालयातून आम्हाला त्यांच्या भेटीची अधिकृत माहिती देण्यात आली आहे. राठोड हे येत्या मंगळवारी 23 तारखेला पोहरादेवीला येणार आहेत. या ठिकाणी ते सहकुटुंब येतील आणि देवीचं दर्शन घेतील, असं सुनील महाराजांनी स्पष्ट केलं.
‘या’ प्रश्नांची उत्तरे देणार?
महंतानी दिलेल्या माहितीमुळे अखेर संजय राठोड 15 दिवसानंतर सार्वजनिक ठिकाणी दिसणार आहेत. त्यामुळे पूजा चव्हाण आत्महत्या प्रकरणावर राठोड बोलणार का? बोलले तर ते काय बोलणार? ते भाजपने केलेले आरोप खोडून काढणार का? ऑडिओ क्लिपमधील आवाजाबाबत काय सांगणार? आदी प्रश्नांची उकल राठोड हे मीडियाशी बोलल्यानंतरच होणार आहे.
पोहरादेवीचं महत्व काय?
वाशिम जिल्ह्यात मानोरा तालुक्यातील श्रीक्षेत्र पोहरादेवी हे ठिकाण बंजारा समाज बांधवांची काशी म्हणून प्रसिद्ध आहे. या ठिकाणी असलेल्या संत सेवालाल महाराज, आई जगदंबामाता आणि राष्ट्रीय संत डॉ. रामराव महाराज यांच्या दर्शनासाठी देश विदेशातून भाविक येथे हजेरी लावलात.
पोहरादेवी येथे बंजारा समाजचे आराध्य दैवत संत सेवालाल महाराज यांची समाधी आहे. नुकतंच ऑक्टोबर महिन्यात संत सेवालाल महाराजांचे वंशज आणि बंजारा समाजाचे धर्मगुरु डॉ. रामराव महाराज यांचं निधन झालं होतं. पंतप्रधान नरेंद्र मोदींपासून ते दिग्गजांनी रामराव महारांजांना श्रद्धांजली अर्पण केली होती.
डॉ. रामराव महाराज यांचे मुंबईच्या लिलावती रुग्णालयात दीर्घ आजाराने निधन झाले होते. त्यानंतर त्यांचे पार्थिव वाशिमच्या मालेगाव येथे आणण्यात आले. त्यानंतर त्यांच्या मूळगावी पोहरादेवी येथे त्यांचे पार्थिव आणण्यात आले. त्यावेळी त्यांच्या अंत्यदर्शनासाठी एकच गर्दी झाली. संत सेवालाल यांचे वंशज असल्याने रामरावबापू महाराज यांच्यावर बंजारा समाजाची अपार श्रध्दा होती. इतरही समाजात त्यांना मान होता.
रामराव महाराजांनी 1948 मध्ये पोहरादेवी येथील गादीवर बसल्यानंतर अन्नत्याग केला. त्यानंतर ते फक्त कडूनिंब, दूध आणि फळांचे सेवन करत होते. गेल्या काही महिन्यांपासून दूध घेतानाही त्यांना त्रास जाणवत होता. त्यामुळे ते फक्त कडूनिंब आणि ज्यूस घेत होते. मात्र त्यांना श्वास घेण्यास त्रास होत असल्याने लिलावती रुग्णालयात दाखल करण्यात आलं. त्या ठिकाणी त्यांची प्राणज्योत मालवली.
पूजा चव्हाण आत्महत्या प्रकरण काय?
मूळ परळीच्या पूजा चव्हाणचा पुण्यातील राहत्या घरातून पडून 7 फेब्रुवारीला मृत्यू झाला. पूजाने आत्महत्या केल्याचा प्राथमिक संशय आहे. स्पोकन इंग्लिश क्लासेससाठी ती भावासोबत पुण्यात रहात होती. तिने तिसऱ्या मजल्यावरुन उडी मारुन आत्महत्या केल्याचा आरोप आहे. त्यानंतर आत्महत्येशी विदर्भातील एका मंत्र्याचा संबंध असल्याची चर्चा सुरु झाली होती. भाजपने रितसर तक्रार दाखल केली. इतकंच नाही तर विरोधी पक्षनेते देवेंद्र फडणवीस यांनी थेट पोलीस आयुक्तांना पत्र लिहून, चौकशीची मागणी केली. इतकं सगळं होत असताना, पूजा चव्हाण आणि कथित मंत्र्यांची ऑडिओ क्लिप समोर आली. एक-दोन नव्हे तर तब्बल 12 ऑडिओ क्लिपमुळे चक्रव्यूहात सापडलेले मंत्री संजय राठोड यांचं नावही उघड झाले. (Sanjay Rathod will present at Poharadevi in washim)
MahaFast News 100 | महाफास्ट न्यूज 100 | 3 PM | 19 February 2021 https://t.co/lslIbtnGsV
| #Maharashtra | #Mumbai | #MarathiNews | #ShivJayanti | #Politics |
— TV9 Marathi (@TV9Marathi) February 19, 2021
संबंधित बातम्या:
पुणे पोलिसांचे पथक यवतमाळमध्ये दाखल, रुग्णालयातील उपचाराबाबत तपास होणार
पूजा चव्हाणला नेमकं काय झालं होतं? ती स्ट्रीप रेड का झाली?; कथित मंत्री का घाबरला?
(Sanjay Rathod will present at Poharadevi in washim)