संजय राऊत यांचा आतापर्यंतचा सर्वात मोठा चॅलेन्ज, महाराष्ट्रात बदला घेण्याचं राजकारण पुन्हा फोफावणार? जेल के बदले जेल…
संजय राऊत यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या सरकारला मोठा इशारा दिलाय.
मुंबई : युवासेना प्रमुख आदित्य ठाकरे यांच्या समर्थनार्थ शिवसेनेच्या ठाकरे गटाचे प्रमुख उद्धव ठाकरे आपल्या शिष्टमंडळासह आज रात्री उशिरा मुंबईहून नागपुरात जाणार असल्याची बातमी ताजी असताना खासदार संजय राऊत यांनी मोठं विधान केलंय. संजय राऊत यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या सरकारला मोठा इशारा दिलाय. “तुमच्या सगळ्या फाईली तयार आहे. उद्या उद्धव ठाकरे यांच्यासोबत नागपुरात जाऊन गौप्यस्फोट करणार”, असा इशारा संजय राऊत यांनी दिलाय.
“तुम्हाला वाटलं, मला तुरुंगात टाकलं म्हणजे मी गप्प बसेल. अरे तुमचे शंभर बाप आले तरी मला गप्प बसवू शकत नाहीत. ज्या कोठडीत मी होतो त्या कोठडीत तुम्हाला टाकल्याशिवाय गप्प राहणार नाही. हा माझा शब्द आहे. तुमच्या सगळ्या फाईली तयार आहेत”, असा इशारा संजय राऊत यांनी दिला.
“आम्हाला उद्या उद्धव ठाकरे यांच्यासोबत नागपुरला जायचं आहे. नागपुरला गेल्यावर आम्ही बडेबडे बॉम्ब फोडणार आहोत”, असं संजय राऊत एका कार्यक्रमात म्हणाले.
“40 गेले, 140 निवडून आणायचे आहेत. आजपासून शिंदे सरकारची झोप उडाली पाहिजे”, असं संजय राऊत आपल्या कार्यकर्त्यांना उद्देशून म्हणाले.
“हा माहौल कुणाला मिळेल का? हा जिवंतपणा, हा उत्साह मिळेल का? असं वाटतं आपण लढाईला चाललोय. वाघाचं काळीज असलेली शिवसेना आहे. आमच्या लढणं तुम्हाला जमणार नाही. हा इथे जमलेला हजारोंचा जनसमुदाय आहे, हा काही खोक्यातून आणलेला नाहीय”, असा टोला त्यांनी लगावला.