महेश गायकवाड यांच्या प्रकृतीबाबत मोठी अपडेट, डिस्चार्ज कधी मिळणार? महत्त्वाची माहिती समोर

गणेश थोरात, Tv9 प्रतिनिधी, ठाणे | 15 फेब्रुवारी 2024 : भाजप आमदार गणपत गायकवाड गोळीबार प्रकरणात जखमी झालेले शिवसेनेचे कल्याण विभाग शहर प्रमुख आणि माजी नगरसेवक महेश गायकवाड आणि त्यांचे सहकारी राहुल पाटील यांना तब्बल 14 दिवसांनंतर उद्या ज्युपिटर रुग्णालयातून दुपारनंतर डिस्चार्ज मिळणार असल्याची माहिती निकटवर्तीयांनी दिली आहे. उल्हासनगर हिल लाईन पोलीस ठाण्यात गणपत गायकवाड यांनी शुक्रवार 2 फेब्रुवारीला महेश गायकवाड आणि त्यांचे सहकारी राहुल पाटील यांच्यावर जमिनीच्या वादावरून गोळ्या झाडल्या होत्या. या गोळीबारात महेश गायकवाड आणि त्यांचे सहकारी राहुल पाटील गंभीर जखमी झाले होते. त्यामुळे दोघांना तातडीने उपचारासाठी ठाण्यातील ज्युपिटर रुग्णालयात हलविण्यात आले होते. डॉक्टरांनी शस्त्रक्रिया करुन महेश गायकवाड यांच्या शरीरातून 6 गोळ्या तर राहुल पाटील यांच्या शरीरातून 2 गोळ्या काढल्या होत्या. त्यानंतर त्यांची प्रकृती बरी असल्याची माहिती समोर येत होती. अखेर त्यांना उद्या रुग्णालयातून डिस्चार्ज मिळणार आहे.

महेश गायकवाड आणि राहुल पाटील यांना ज्युपिटर रुग्णालयातून डिस्चार्ज दिल्यानंतर दोघांच्या समर्थनार्थ मोठ्या संख्येने ठाणे आणि कल्याण डोंबिवली या ठिकाणाहून शक्ती प्रदर्शन होण्याची शक्यता नाकारता येत नाही. कायदा आणि सुव्यवस्था बघता मोठ्या प्रमाणात पोलीस बंदोबस्त देखील असणार आहे. दोघांना त्यांचे चाहते आणि शिवसैनिक भेटण्यासाठी जागोजागी एकच गर्दी करणार आहेत.

या गोळीबार प्रकरणात गणपत गायकवाड यांच्यासह 5 जणांना 14 दिवसांची न्यायालयीन कोठडी उल्हासनगर चोपडा कोर्टाकडून देण्यात आलेली आहे. सध्या सर्व आरोपींना सुरक्षेच्या दृष्टीकोनातून तळोजा कारागृहात हलविण्यात आले आहे. या प्रकरणामुळे येणाऱ्या काळात कल्याण-डोंबिवली मतदारसंघात शिवसेना विरुद्ध भाजप असा सामना पाहायला मिळण्याची शक्यता आहे. महेश गायकवाड आणि राहुल पाटील यांच्या उपचारादरम्यान मुख्यमंत्री एकनाथ शिंदे, खासदार श्रीकांत शिंदेंसह इतर नेते मंडळींनी देखील भेटून त्यांच्या तब्येतीची विचारपूस केली होती.