पालखी मार्गावर परिवहन विभागाचा चित्ररथ, रस्ते आणि वाहन सुरक्षेचे धडे देणार
या अभिनव उपक्रमाच्या नियोजनासाठी आणि मार्गदर्शन करण्यासाठी मंत्री प्रताप सरनाईक स्वतः उद्या दिनांक ११ जून रोजी या पालखी मार्गाने पंढरपूर येथे जाणार आहेत.
सर्वांना आषाढी एकादशी निमित्ताने पंढरीच्या विठूरायाच्या दर्शनाचे वेध लागले आहेत. यात आता संत तुकारामाची पालखी येत्या १८ जूनपासून देहू येथून प्रस्थान करणार आहे. या पालखीच्या मार्गावर आता राज्याच्या परिवहन विभागाच्या विविध योजनांची माहिती देणारा चित्ररथ फिरणार आहे. यामुळे राज्याच्या परिवहन विभागाच्या तसेच रस्ते सुरक्षा संदर्भात विविध माहितीद्वारे जनप्रबोधन करण्यात येणार आहे.
राज्याच्या परिवहन विभागाचा जनमानसात प्रचार आणि प्रसार करण्यासाठी परिवहन विभागाचा चित्ररथ यंदा तुकाराम महाराजांच्या पालखी मार्गावर दिंडी सोबत मार्गक्रमण करणार असल्याची माहिती परिवहन मंत्री प्रताप सरनाईक यांनी दिली. या संदर्भात नियोजन आणि मार्गदर्शन करण्यासाठी मंत्री सरनाईक हे स्वतः उद्या (११ जुन रोजी) पंढरपूरपर्यंत या पालखी मार्गाचा दौरा करणार आहेत.
रस्ता सुरक्षा विषयक प्रशिक्षण आणि प्रबोधन
परिवहन मंत्री प्रताप सरनाईक पुढे म्हणाले, संत तुकाराम महाराजांची पालखी १८ जून रोजी देहू येथून प्रस्थान करणार आहे. १८ जून ते ५ जुलै दरम्यान संपूर्ण पालखी मार्गावर दिंडीसोबत परिवहन विभागाने तयार केलेल्या एलईडी स्क्रीन, पोस्टर , बॅनरच्या माध्यमातून विविध योजनांची माहिती देणारा चित्ररथ सहभागी होणार आहे. या पालखी मार्गावर विविध ठिकाणी सर्वसामान्य नागरिक आणि भक्तगण संत तुकाराम महाराजांच्या पालखीचे दर्शन घेण्यासाठी येत असतात. त्यांना या चित्ररथाच्या माध्यमातून परिवहन योजनांची विशेषतः रस्ता सुरक्षा विषयक प्रशिक्षण आणि प्रबोधन, सुरक्षित वाहन चालवणे अशा विविध योजनांची माहिती देण्यासाठी, त्याचा प्रचार आणि प्रसार करण्यासाठी या अभिनव उपक्रमाची यंदापासून सुरुवात करण्यात येणार आहे, असे प्रतिपादन परिवहन मंत्री सरनाईक यांनी केले.
