झाड कोसळून 5 वर्षांच्या मुलावर काळाचा घाला! वाशिममधील हृदयद्रावक घटना, दोघे जण जखमी

वाशिम : बिहारमध्ये वीज कोसळून तब्बल 33 जणांचा मृत्यू झाल्याची घटना ताजी असतानाच वाशिमधून (Washim News) हृदयद्रावक घटना समोर आली आहे. वाशिम तालुक्यात झाड पडून एका पाच वर्षांच्या चिमुरड्याचा मृत्यू झाला आहे. तर एक महिला आणि पुरुष गंभीर जखणी झाले आहेत. पहाटे तीन वाजण्याच्या सुमारात ही घटना घडली. वाशिममध्ये जोरदार (Washim rain Update) पाऊस झाला. मध्यरात्रीपासून झालेल्या जोरदार पावसात मानोरा तालुक्यात ही दुर्दैवी घटना घडली. पहाटेच्या सुमारास मानोरा तालुक्यामधील शेंदोण इथं वादळात झाड पडून धनाजी सातपुते हा अवघ्या पाच वर्षांचा मुलगा मृत्युमुखी पडला. या घटनेनं संपूर्ण मानोरा तालुक्यात हळहळ व्यक्त केली जातेय. तर अन्य दोघं जण गंभीर जखमी झाले आहे. वाशिम जिल्ह्यात शुक्रवारपासूनच मान्सूनपूर्व पावसानं (Pre-Monsoon Rain in Maharashtra) हजेरी लावली होती. सोसाट्याच्या वाऱ्यासह जोरदार पावसानं वाशिममध्ये मुसळधार पाऊस झाला.

रात्री पावसाचा जोर वाढला…

वाशिममध्ये रात्रीच्या सुमारास पावसाचा जोर आणखी वाढला. वाशिमच्या मानोरा तालुक्याला पावसानं अक्षरशः झोडपून काढलं. मान्सूनपूर्व पावसाच्या सरींनी उकाड्यानं हैराण झालेल्यांना एकीकडे दिला दिला. मात्र मानोऱ्याच्या शेंदोणामध्ये घडलेल्या दुर्दैवी घटनेनं गावावर शोककळा पसरली आहे.

पाहा महत्त्वाची बातमी : नवाब मलिकांच्या अडचणी वाढणार?

काळजी घेण्याचं आवाहन

मान्सूनपूर्व पावसाच्या सरींनी राज्यातील बहुतांश जिल्ह्यांमध्ये हजेरी लावली आहे. सांगलीतही अतिवृष्टीनं पूल पाण्याखाली गेला होता. पश्चिम महाराष्ट्रासह कोकण आणि मराठवड्यात मान्सूनपूर्व पावसाच्या सरी बरसल्या आहेत. त्यामुळे काळजी घेण्याचं आणि सतर्कता बाळगण्याचंही आवाहन केलं जातंय.

बिहारमध्ये 33 जणांचा वीज कोसळून मृत्यू

दरम्यान, बिहारमध्ये वाशिममध्ये 33 जणांचा वीस कोसळून मृत्यू झालाय. विजांच्या कडकडाटासह सोसाट्याच्या वाऱ्याची हजेरी लावकर बिहारमध्ये मुसळधार पाऊस झालाय. बिहारच्या 16 जिल्ह्यांमध्ये घडलेल्या वेगवेगळ्या घटनांमध्ये तब्बल 33 जणांचा बळी गेला असून मृतांच्या नातेवाईकांना प्रत्येकी चार लाख रुपयांची मदत जाहीर करण्यात आली आहे.