पाणीपुरवठा बंद असल्याने आज नाशिककरांची निर्जळी; उद्याही कमी दाबाने पाणी, जलवाहिन्यांची दुरुस्ती सुरू
नाशिकमध्ये आज पाणीपुरवठा होणार नसल्याची माहिती अनेक भागातल्या नागरिकांना नव्हती. त्यामुळे त्यांची चांगलीच तारंबळ उडाली.
नाशिकः नाशिकचा पाणीपुरवठा शनिवारी दिवसभर बंद राहणार असून, उद्या रविवारीही कमी दाबाने पाणी येईल, असे महापालिकेच्या (Municipal Corporation) पाणीपुरवठा विभागातर्फे कळवण्यात आले आहे. जलवाहिन्यांच्या दुरुस्तीमुळे शहराचा पाणीपुरवठा विस्कळीत झाला आहे. तो सोमवारीच सुरळीत होण्याची शक्यता आहे.
येथे सुरू दुरुस्ती
गंगापूर आणि मुकणे धरणातून पाणीपुरवठा करणाऱ्या मुख्य जलवाहिन्यांची आज आणि उद्या दुरुस्ती करण्यात येत आहे. सोबतच त्र्यंबकरोड, आयटीआयसमोर शुद्ध पाण्याची ग्रॅव्हिटी मेन पाईपलाईनच्या दुरुस्तीचे कामही आहे. त्यातच शहराला पाणीपुरवठा करणारी पाईपलाईन बदलण्याचे काम होणार आहे. गंगापूर धरणावरील पाईपाईलनालाही गळती लागली आहे. पंपिंग स्टेशन रस्त्यावर या गळतीच्या दुरुस्तीचे काम केले जाणार आहे. त्यात भरास भर म्हणजे मुकणे धरणावर महावितरणचे काम सुरू आहे. येथे 220 के. व्ही. फीडर लाईनचे काम करण्यात येणार आहे. त्यामुळे शनिवारी शहराचा पाणीपुरवठा बंद राहणार आहे. सोबतच रविवारी सकाळीही कमी दाबाने पाणीपुरवठा होईल, असे महापालिकेच्या वतीने कळवण्यात आले आहे.
अनेकांना झाला त्रास
नाशिकमध्ये आज पाणीपुरवठा होणार नसल्याची माहिती अनेक भागातल्या नागरिकांना नव्हती. त्यामुळे त्यांची चांगलीच तारंबळ उडाली. शक्यतो नाशिककरांना कधी पाणी चिंता नसते. त्यामुळे अनेकांना पाणी भरून ठेवायची सवय नाही. एका दिवसापुरते पाणी असते. त्यात वापरायचे पाणी शिल्लक राहतेही. मात्र, पिण्याचे पाणी हे दररोज ताजे भरले जाते. आज पाणीपुरवठा बंद असल्याने कित्येकांना जारचे पाणी विकत घ्यावे लागले. तर काहींनी बोअरवेलच्या पाण्यावर आजचा दिवस साजरा करायचा निर्णय घेतला. आता थेट सोमवारीच पाणीपुरवठा सुरळीत होणार आहे. त्यामुळे दोन दिवस नाशिकरांची ओढाताण होणार आहे.
गंगापूर धरण भरले
नाशिककडे सुरुवातीला पाठ फिरवलेल्या पावसाने सप्टेंबर महिन्यात जोरदार हजेरी लावली. त्यामुळे गोदावरी नदीला एका महिन्यात चक्क चारवेळेस पूर आला. या दमदार पावसामुळे नाशिकला पाणीपुरवठा करणारे गंगापूर धरण भरले आहे. शहर परिसारातील आणि जिल्ह्यातील इतर सारी छोटी-मोठी धरणे भरली आहेत. त्यामुळे नाशिककरांचा यंदाचा पाणीप्रश्न मिटला आहे. सोबतच मुंबईला पाणीपुरवठा करणारे इगतपुरी तालुक्यातील अप्पर वैतरणा धरणही यंदा तुडूंब भरले आहे. त्यामुळे मुंबईकरांची पाणीचिंता कमी झाली आहे.
इतर बातम्याः
