Ladki Bahin Yojna : लाडकी बहिणीचा हफ्ता बंद झाल्यास काय करावं? ई-केवायसीतील चूक कशी दुरुस्त करावी? पुन्हा मिळू शकतो लाभ

Ladki Bahin Yojna : ई-केवायसीमध्ये चुकीची माहिती भरल्यामुळे लाडकी बहीण योजनेतून हजारो महिला अपात्र ठरल्या होत्या. गेल्या दोन-तीन महिन्यांपासून दीड हजार रुपयांचा हफ्ता बंद झाल्यामुळे असंख्य लाडक्या बहिणी संतप्त झाल्या आहेत. याविषयी आता राज्यमंत्री पंकज भोयर यांनी महत्त्वपूर्ण माहिती दिली आहे. “लाडकी बहीण योजनेसाठी ई-केवायसीची प्रक्रिया करताना अनेकांकडून चुकीची माहिती भरली गेली, त्यामुळे काहींचे हफ्ते बंद झाले होते. ही चूक दुरुस्त करण्याच्या सूचना संबंधित विभागाला तातडीने दिल्या आहेत,” असं ते म्हणाले. त्याचसोबत ज्यांना लाडकी बहीण योजनेचा हफ्ता मिळालेला नाही, त्यांना तो लवकरच मिळेल, असं आश्वासन त्यांनी यावेळी दिलं आहे.

काय म्हणाले पंकज भोयर?

“माननीय मुख्यमंत्री महोदयांनी जी लाडकी बहीण योजना या राज्यातल्या आमच्या महिला भगिनींकरता सुरू केली, त्यातल्या काहींचे पैसे ई केवायसी केल्यानंतर प्रलंबित आहेत. त्या संदर्भात तातडीने प्रशासनाची बैठक बोलविण्यात आलेली आहे. पुन्हा एकदा अंगणवाडी सुपरवायझर यांच्या माध्यमातून ज्या ज्या आमच्या लाडक्या बहिणींचे पैसे त्या ठिकाणी प्रलंबित आहेत, त्याची कार्यवाही त्या ठिकाणी सुरू करण्याचे निर्देश प्रशासनाला देण्यात आले आहेत. मला असं वाटतं की ईकेवायसी करताना काही माहिती चुकीची भरण्यात आली, त्यामुळे हे पैसे खात्यात जमा होणं बंद झालं असेल. तर या ठिकाणी क्रॉस व्हेरिफिकेशन करण्याचा सूचना देण्यात आलेल्या आहेत,” असं भोयर यांनी सांगितलं.

याविषयी ते पुढे म्हणाले, “लाडक्या बहिणींच्या थकलेल्या हफ्त्यांसंदर्भात तातडीने संबंधित विभागासोबत बैठक घेतली. ई-केवायसीतील चूक दुरुस्त करण्याच्या सूचना त्यांना दिल्या आहेत. लाडक्या बहिणींनी त्यांच्या ग्रामपंचायतीच्या अंगणवाडी सेविकांजवळ किंवा शहरातल्या लाडक्या बहिणींनी आपल्या भागातल्या अंगणवाडी सेविकांजवळ आधार कार्डची झेरॉक्स, संपर्क क्रमांक द्यायचा आहे. पुन्हा एकदा क्रॉस व्हेरिफिकेशन करून लाडक्या बहिणींचा हफ्ता पुन्हा सुरू करण्यात यावा, अशा सूचना प्रशासनाला देण्यात आल्या आहेत.”

लाडक्या बहिणींचा हफ्ता रखडल्यानंतर अनेकांनी जिल्ह्यातील महिला व बालविकास कार्यालयासमोर गर्दी केली होती, काहींनी तर ठिय्याच मांडला होता. अखेर याची दखल घेत महिला व बालविकास विभागाने मोठा निर्णय घेतला. राज्य शासनाच्या महिला व बालविकास विभागाच्या सचिवांनी राज्यातील सर्व महिला व बालविकास अधिकाऱ्यांची व्हिडीओ कॉन्फरन्सद्वारे बैठक घेतली. या बैठकीत त्यांनी ई-केवायसी भरताना चूक झालेल्या महिलांची अंगणवाडी सेविकांमार्फत पुन्हा व्हेरिफिकेशन करून त्यांना पूर्ववत लाभ देण्याचे स्पष्ट आदेश दिले होते. या निर्णयामुळे अनेक लाडक्या बहिणींना मोठा दिलासा मिळाला आहे.

ई-केवायसी भरताना चूक झाल्यास काय करावं?

• लाडक्या बहिणींनी अंगणवाडी सेविकांजवळ आधार कार्डची झेरॉक्स आणि संपर्क क्रमांक जमा करावा.
• त्यानंतर अंगणवाडी सेविकांकडून त्याची पडताळणी केली जाईल.
• पडताळणीनंतर लाडक्या बहिणींचा लाभ पूर्ववत होईल.