जनतेच्या दरबारात…, शिवसेना कोणाची? न्यायालयातील सुनावणीनंतर शिंदे पहिल्यांदाच बोलले, मोठं विधान

आज शिवसेना पक्षाचं चिन्ह आणि नाव कोणचं? यावर सुप्रीम कोर्टात सुनावणी पार पडली. यावेळी ज्येष्ठ वकील कपिल सिब्बल यांनी सुप्रीम कोर्टात शिवसेना ठाकरे गटाची बाजू मांडली. कपिल सिब्बल यांनी यावेळी जोरदार युक्तिवाद केला. राजकीय पक्ष हा विधामंडळ पक्षापेक्षा मोठा असतो असं त्यांनी म्हटलं. या पार्श्वभूमीवर आता शिवसेना नेमकी कोणाची? यावरून राजकीय वर्तुळात चर्चा सुरू झाली आहे, यावर विरोधी पक्षांच्या प्रतिक्रिया देखील समोर येत आहेत. दरम्यान   यावर आता उपमुख्यमंत्री एकनाथ शिंदे यांची पहिली प्रतिक्रिया समोर आली आहे. शिवसेना नेमकी कोणाची? यावरून राजकीय वर्तुळात सुरू असलेल्या चर्चेवर आणि विरोधकांच्या टीकेवर बोलताना उपमुख्यमंत्री एकनाथ शिंदे यांनी जोरदार प्रत्युत्तर दिले आहे.  शिवसेना कोणाची, याचं स्पष्ट उत्तर महाराष्ट्रातील जनतेनेच आपल्या कौलातून दिले आहे, असे वक्तव्य त्यांनी प्रसारमाध्यमांशी बोलताना केलं आहे.

पूर्वी आमच्याकडे ४० आमदार होते, आज जनतेने ६० आमदारांना निवडून दिले आहे. नुकत्याच झालेल्या विधानसभा, महानगरपालिका, जिल्हा परिषद आणि नगर परिषदांच्या निवडणुकांमध्ये शिवसेना हा दुसऱ्या क्रमांकाचा सर्वात मोठा पक्ष म्हणून समोर आला आहे. त्यामुळे जनतेच्या दरबारात शिवसेनेवरचा विश्वास सिद्ध झाला आहे. सरकार आणि मुख्यमंत्री ‘घटनाबाह्य’ असल्याचा आरोप करणे ही विरोधकांची आता जुनी ‘रिपीट कॅसेट’ झाली आहे. जेव्हा एखादा निर्णय यांच्या बाजूने लागतो, तेव्हा हे न्यायालयाचे कौतुक करतात आणि निर्णय विरोधात गेला की न्यायव्यवस्था व निवडणूक आयोगावर आरोप करतात, असा टोला यावेळी शिंदे यांनी विरोधकांना लगावला आहे.

दरम्यान लोकशाहीत बहुमताला सर्वोच्च महत्त्व असते. हे प्रकरण सध्या न्यायालयात असल्याने त्यावर अधिक भाष्य करणे योग्य ठरणार नाही, परंतु आमचा देशाच्या न्यायव्यवस्थेवर आणि संविधानावर पूर्ण विश्वास आहे, असंही यावेळी एकनाथ शिंदे यांनी म्हटलं आहे. दरम्यान दोन दिवस या प्रकरणावर सुनावणी पार पडली आहे, आता शिवसेना पक्ष आणि चिन्ह कोणाचं यावर पुढील सुनावणी पुढच्या आठवड्यात होणार आहे.