दिल्लीच्या जंतरमंतरवर पुन्हा गोंधळ; दगडफेकीनंतर पोलिसांकडून आंदोलकांवर लाठीचार्ज, अश्रूधुराच्या नळकांड्याही फोडल्या

नवी दिल्लीच्या जंतरमंतरवर मोठी बातमी हाती आली आहे. कॉक्रोच जनता पार्टी आंदोलनाला बसलेल्या जंतर-मंतर परिसरात पुन्हा गोंधळ झाला आहे. जंतरमंतर परिसरात दगडफेक झाली आहे. दगडफेकीनंतर पोलिसांनीही आंदोलकांवर लाठीचार्ज केला आहे. लाठीचार्जनंतर आंदोलकांवर अश्रूधुराच्या नळकांड्याही फेकल्या आहेत. केंद्रीय शिक्षणमंत्री धर्मेंद्र प्रधान यांच्या राजीनाम्यासाठी आंदोलक आक्रमक झाल्याचे सांगण्यात येत आहे. त्यानंतर सीजेपीच्या आंदोलकांनी आक्रमक पवित्रा घेतल्याने घटनास्थळी उपस्थित पोलिसांनी लाठीचार्ज केल्याची माहिती समोर आली आहे.

नीट पेपरफुटीवरून बिहारमध्ये वातावरण तापलं आहे. बिहारमध्ये आंदोलकांनी जाळपोळ केली आहे. बिहारच्या पटना, छपरानंतर आता जंतरमंतरमध्येही मोठा गोंधळ झाला. आंदोलनस्थळी पोलीस आणि आंदोलक आमनेसामने आले. त्यानंतर या परिसरात दगडफेक झाली. या दगडफेकीनंतर आंदोलकांवर नियंत्रण मिळवण्यासाठी पोलिसांनी तातडीने आंदोलकांवर लाठीचार्ज करण्यास सुरुवात केली. पोलिसांनी आंदोलकांवर अश्रूधुराच्या नळकांड्या देखील फोडल्या. पोलिसांच्या लाठीचार्जनंतर आंदोलकांची एकच धावाधाव झाली. या घटनेनंतर पोलिसांनी बंदोबस्त आणखी कडक केला आहे.

कॉक्रोच जनता पार्टीच्या आंदोलकांनी केलेल्या दगडफेकीत पोलीस अधिकारी जखमी झाल्याची माहिती आहे. या दगडफेकीत पोलीस कर्मचाऱ्यांसहित आंदोलक देखील जखमी झाल्याची शक्यता व्यक्त केली जात आहे. दगडफेकीनंतर पोलिसांची देखील धावाधाव झाली. दगडफेकीमुळे पोलीस सैरावैरा पळत असल्याचेही व्हिडिओतून समोर आलं आहे.

बिहारमध्ये आंदोलनाला हिंसक वळण

बिहारमध्ये शनिवारी झालेल्या आंदोलनला हिंसक वळण लागलं. या आंदोलनादरम्यान आंदोलक आणि पोलिसांमध्ये संघर्ष पाहायला मिळाला. रस्त्यावर हिंसाचारादरम्यान गोळीबाराची घटना घडली. समोरून गोळीबार झाल्यानंतर प्रत्युत्तर म्हणून गोळीबार केल्याचा दावा पोलिसांनी केला आहे. या गोळीबारात 3 युवक जखमी झाले. तर वरिष्ठ अधिकाऱ्यांसहित 25 कर्मचारी जखमी झाल्याची माहिती हाती आली आहे. विरोधीपक्ष नेते तेजस्वी यादव यांनी गोळीबाराच्या घटनेचा निषेध केला आहे. पोलिसांनी एके-47 बंदुकीने गोळीबार केल्याचा दावा तेजस्वी यादव यांनी केला आहे. पोलिसांनी केलेल्या गोळीबारात काही तरुण जखमी झाले असून त्यांना उपचारासाठी जवळील रुग्णालयात दाखल करण्यात आलं आहे. प्राथमिक उपचारानंतर पटना येथे हलविण्यात आलं आहे.