पंजाबचे माजी मुख्यमंत्रीही भाजपमध्ये; पक्षच भाजपात विलीन…

चंदीगडः पंजाबचे माजी मुख्यमंत्री कॅप्टन अमरिंदर सिंग (Former Chief Minister Captain Amarinder Singh) यांनी आज भारतीय जनता पक्षात प्रवेश केला. त्यांनी भाजपमध्ये प्रवेश करताच कॅप्टन अमरिंदर यांनी पंजाब लोक काँग्रेस (PLC) हा त्यांचा पक्षही भारतीय जनता पक्षात विलीन केला आहे. आज नरेंद्र सिंह तोमर आणि किरेन रिजिजू या मंत्र्यांकडून त्यांना भाजपचे सदस्यत्व मिळवून देण्यात आले आहे. अमरिंदर यांच्यासोबत त्यांचे अनेक सहकारीही भाजपमध्ये (BJP) दाखल झाल्याने आता पंजाबच्या राजकारणाला वेगळे वळण लागण्याची शक्यता आहे.

भाजपमध्ये प्रवेश केल्यानंतर अमरिंदर सिंग यांनी त्यांच्या समर्थकांशी चर्चा केली असल्याचे सांगितले जात आहे. यामध्ये पंजाबचे भविष्य पाहायचे असेल तर भाजपमध्ये विलीन होण्याचा निर्णय घेण्यात आला आहे असंही सांगण्यात आले आहे. आमची आणि भाजपची विचारधारा एकच असल्याचेही त्यांनी यावेळी स्पष्ट केले.

कॅप्टन अमरिंदर सिंग यांनी 2022 च्या पंजाब विधानसभा निवडणुकीपूर्वी काँग्रेसपासून फारकत घेतली होती. त्यानंतर त्यांनी 2022 च्या निवडणुकीसाठी पीएलसी पक्षाची स्थापना करुन आणि नंतर भाजपसोबत एकत्र निवडणूक लढवली होती. त्यानंतर आपने पंजाबमध्ये मारलेल्या मुसंडीत भाजप आणि अमरिंदर सिंग हे दोघंही चितपट झाले होते.

पंजाबमध्ये अकाली दलात फूट पडल्यानंतर भाजपला पंजाबमध्ये एक तगडा शीख उमेदवार पाहिजे होता. त्याच शोधात भाजप होते. त्यामुळे पंजाबमध्ये भाजपला एक नवसंजीवनी मिळणार असल्याचे सांगण्यात येत होते. भाजपच्या या सूत्रात कॅप्टन अमरिंदर सिंग हे एकदम फिट बसतात. त्यांच्यामुळे पंजाबमधील शीख आणि हिंदू दोन्ही समुदायांवर पकड राहणार आहे.