कोरोनाचं संकट रोखता येत नसेल तर लष्कराकडे आरोग्य सेवा सोपवा; नितीशकुमारांना पाटना हायकोर्टाने फटकारले

बिहारमधील वाढत्या कोरोनाच्या संसर्गावरून पाटना उच्च न्यायालयाने बिहारमधील नितीशकुमार सरकारला पुन्हा एकदा फटकारले आहे. (if not improving then hand over health service to army, says patna high court)

नितीश कुमार

भीमराव गवळी | Updated on: May 04, 2021 | 6:51 PM

पाटना: बिहारमधील वाढत्या कोरोनाच्या संसर्गावरून पाटना उच्च न्यायालयाने बिहारमधील नितीशकुमार सरकारला पुन्हा एकदा फटकारले आहे. वारंवार आदेश देऊनही कोरोना परिस्थितीत काहीच सुधारणा झालेली नाही. ही लज्जास्पद बाब आहे. परिस्थिती सुधारत नसेल आणि तुम्हाला कोरोनाचं संकट रोखता येत नसेल तर आरोग्य सेवा लष्कराकडे सोपवा, अशा शब्दात पाटना उच्च न्यायालयाने नितीशकुमार सरकारला फटकारले आहे. (if not improving then hand over health service to army, says patna high court)

बिहारमधील कोरोनाच्या वाढत्या प्रकोपावर पाटना उच्च न्यायालयात सुनावणी झाली. यावेळी राज्य सरकारने कोर्टाला लॉकडाऊनची माहिती दिली. यावेळी जस्टिस सीएस सिंह यांच्या खंडपीठाने मौखिक सुनावणी करताना सरकारला फटकारले. राज्यात 5 मे पासून ते 15 मेपर्यंत लॉकडाऊन करण्यात आला आहे, असंही राज्य सरकारकडून कोर्टाला सांगितलं गेलं. यावेळी कोर्टाने कोरोनाचं संकट निवारण्यात राज्य सरकार अपयशी ठरल्याबद्दल तीव्र नाराजी व्यक्त केली.

गुरुवारी सुनावणी

प्रत्येक वेळी आदेश देऊनही परिस्थितीत सुधारणा होत नाही. ही लज्जास्पद बाब आहे. अशा परिस्थितीत राज्याने आरोग्य सेवा लष्कराच्या हाती सोपवली पाहिजे, असं कोर्टाने म्हटलं. याप्रकरणावर आता 6 मे रोजी सुनावणी होणार आहे. त्यानंतर अॅडव्होकेट जनरल ललित किशोर यांनी मीडियाशी संवाद साधला. कोर्टाने लिखित स्वरुपात अजून काही म्हटलेलं नाही. मात्र, आमच्या मतानुसार तुम्ही फेल ठरत आहात. तर तुम्ही कोविड मॅनेजमेंटची जबाबदारी लष्कराकडे का सोपवत नाही? असं कोर्टाने मला सांगितलं आहे, असं किशोर म्हणाले.

कशाच्या आधारे लष्कराकडे सेवा द्यायची?

निरीक्षणावेळी कोर्टाने हा सवाल केला. त्यावर आम्ही आमची बाजू मांडली आहे. तुम्ही कशाच्या आधारे कोविड मॅनेजमेंटची जबाबदारी लष्कराकडे सोपवण्याचं बोलत आहात? अशी विचारणा आम्ही कोर्टाला केली आहे. जर प्रत्यक्षातील वास्तव योग्य आहे तर केवळ तुम्हाला वाटतं म्हणून तुम्ही ही जबाबदारी लष्कराकडे सोपवू शकता, असंही कोर्टाला सांगितल्याचं किशोर यांनी सांगितलं. त्यानंतर कोर्टाने या विषयावर अजून कोणताही निर्णय घेण्यात आला नाही. आधी तुम्ही तुमची सर्व माहिती आम्हाला द्या. त्यानंतर त्यावर विचार करू, असं कोर्टाने म्हटलं आहे. आम्हाला डिटेल्स सादर करण्यासाठी एक दिवसाचा अवधी मिळालेला आहे. आता गुरुवारी त्यावर सुनावणी होणार आहे, असं त्यांनी सांगितलं. (if not improving then hand over health service to army, says patna high court)