जर तुम्ही आमच्या देशात सैन्य उतरवलं तर…; इराणची अमेरिकेला हादरवणारी धमकी, युद्ध आणखी पेटणार?

अमेरिका -इस्त्रायल आणि इराणमध्ये भीषण युद्ध सुरू आहे. गेल्या एक महिन्यापासून हे युद्ध सुरूच आहे. अमेरिका आणि इस्त्रायलकडून इराणवर भीषण हवाई हल्ले करण्यात आले. मात्र तरी देखील इराण या युद्धातून माघार घेण्यास तयार नाहीये. त्यामुळे आता अमेरिकेकडून प्लॅन बी सक्रिय करण्याचा विचार सुरू आहे. अमेरिकेकडून आता इराणच्या भूमीवर सैन्य उतरवण्याची तयारी सुरू झाली आहे. याच तयारीचा एक भाग म्हणून अमेरिकेनं आपले हजारो सैनिक मध्य पूर्वेत पाठवले आहेत. असा अंदाज वर्तवला जात आहे की, अमेरिका इराणसाठी सर्वात महत्त्वाचं असलेलं खर्ग बेट ताब्यात घेऊ शकते. जर अमेरिकेन इराणचं खर्ग बेट ताब्यात घेण्याचा प्रयत्न केला तर हे युद्ध आणखी भडकण्याची शक्यता आहे.

अमेरिकेकडून इराणमध्ये सैन्य घुसवण्याची तयारी सुरू असतानाच आता इराणकडून अमेरिकेला हादरवणारी धमकी देण्यात आली आहे. इराणच्या संसदेचे अध्यक्ष मोहम्मद बाकीर कालिबफ यांनी अमेरिकेला धमकी दिली आहे. आम्ही तुमचं सैन्य इराणमध्ये कधी प्रवेश करतं याची वाटच पहात आहोत. आमचं इराणी सैन्य तुमच्या सैन्याला जाळून टाकेल, त्यांची आम्ही राख करू असं मोहम्मद बाकिर कालिबफ यांनी म्हटलं आहे.

दरम्यान दुसरीकडे एक रिपोर्ट समोर आला आहे, या रिपोर्टने अमेरिका आणि इस्त्रायलमध्ये खळबळ उडाली आहे. इराणकडून मोठा दावा करण्यात आला आहे. हे युद्ध दोन वर्ष जरी सुरू राहिलं तरी आम्हाला फार काही फरक पडणार नाही. युद्ध सुरू होऊन एक महिना झाला आहे, मात्र आम्ही आतापर्यंत आमच्या पूर्ण क्षमतेच्या फक्त 30 टक्के इतक्याच मिसाईलाचा वापर केला आहे. अजूनही आमच्याकडे मिसाईलचा 70 टक्के साठा शिल्लक असल्याचा दावा इराणकडून करण्यात आला आहे. त्यामुळे आता हे युद्ध लांबण्याची चिन्हं आहेत. दरम्यान युद्ध सुरू होऊन फक्त एक महिनाच झाला आहे, तर जगभरात मोठं इंधन संकट निर्माण झालं आहे. जर हे युद्ध लांबलं तर जगावर फार मोठं संकट येण्याची शक्यता आहे.