ममता बॅनर्जींच्या पक्षात उभी फूट? तब्बल 59 आमदार…बंगालच्या राजकारणात मोठी खळबळ; नेमकं काय घडतंय?

West Bengal TMC MLA Revolt : पश्चिम बंगालमध्ये मोठ्या राजकीय घडामोडी घडत आहेत. माजी मुख्यमंत्री ममता बॅनर्जी यांच्या हातातून सत्ता गेल्यानंतर त्यांच्या तृणमूल काँग्रेस पक्षात मोठी अस्वस्थता निर्माण झाली आहे. या पक्षात उभी फूट पडण्याची दाट शक्यता व्यक्त केली जात आहे. मिळालेल्या माहितीनुसार पक्षातील 80 आमदारांपैकी तब्बल 59 आमदार हे बंडाच्या तयारीत आहेत. त्यामुळे आता ममता बॅनर्जी यांचे टेन्शन वाढले आहे.

तृणूलमध्ये नेमकं काय घडत आहे?

मिळालेल्या माहितीनुसार ममता बॅनर्जी यांनी हकालपट्टी केलेल्या आमदार ऋतब्रत बॅनर्जी आणि संदीपन साहा यांच्या पाठीशी एकूण 59 आमदार उभे ठाकले आहेत. ऋतब्रत बॅनर्जी यांना एकूण 59 आमदारांचे समर्थन असून ते लवकरच विरोधी पक्षनेते होण्याची शक्यता आहे. सत्तेतून दूर होताच आमदारांमध्ये बॅनर्जी यांच्याविरोधात असंतोष निर्माण झाला आहे. त्यामुळेच बॅनर्जी यांच्या तृणमूल पक्षात उभी फूट पडण्याची शक्यता आहे. ममता बॅनर्जी यांनी ऋतब्रत बॅनर्जी यांना पक्षातून बाहेरचा रस्ता दाखवल्यानंतर ते विधानसभेत दाखल झाले आहेत. त्यानंतर तृणमूलचे 20 आमदारदेखील विधानसभेत पोहोचले आहेत. त्यामुळेच आता लवकरच काहीतरी मोठं घडण्याची शक्यता व्यक्त केली जात आहे.

बंडखोर आमदारांची नेमकी मागणी काय?

तृणमूल काँग्रेसमधील सध्याच्या परिस्थितीवर बंडखोर आमदारांत सामील झालेले मुस्तफिजुर रहमान यांनी सविस्तर सांगितले आहे. आम्ही बंडखोरी केलेल्या 59 आमदारांनी अद्याप विरोधी पक्षनेत्याच्या प्रस्तावावर सही केलेली नाही. परंतु एखाद्या वरिष्ठ नेत्याला विरोधी पक्षनेता करावे, असे आमचे मत आहे, असे रहमान यांनी सांगितले आहे.

लवकरच बंडखोर आमदार करणार मागणी

दरम्यान, आता बंगाल विधानसभेचे अध्यक्ष रथींद्र बोस हे विधानभवनात पोहोचले आहेत. बंडखोर आमदार लवकरच त्यांची भेट घेणार आहेत. या भेटीत ऋतब्रत बॅनर्जी यांनाच विरोधी पक्षनेता करावे, अशी मागणी तृणमूलचे बंडखोर आमदार करू शकतात. त्यामुळे आता भविष्यात नेमकं काय घडणार? ममता बॅनर्जी ही संभाव्य फूट रोखणार का? याकडे संपूर्ण देशाचे लक्ष लागले आहे.