माझ्या मुलाने दुसऱ्या मजल्यावरुन उडी मारली आणि…; विमान धडकलेल्या हॉस्टेलमधील मुलाच्या आईची प्रतिक्रिया
सध्या सोशल मीडियावर मेडिकल कॉलेजच्या हॉस्टेलमधील मुलांच्या आईचा एक व्हिडीओ व्हायरल झाला आहे. नेमकं त्यांचा मुलगा कसा वाचला हे त्या सांगताना दिसत आहेत.
अहमदाबाद येथे गुरुवारी (12 जून 2025) दुपारी एअर इंडियाचे विमान AI-171चा अपघात झाला. लंडनला जाणाऱ्या या विमानात क्रू मेंबर्ससह एकूण 242 प्रवासी होते. हे विमान मेडिकल कॉलेजच्या हॉस्टेलला जाऊन धडकले. गुजरातच्या सिव्हिल रुग्णालयात पोहोचलेल्या रमिलाबेन नावाच्या महिलेने सांगितले की, तिचा मुलगा जेवणाच्या सुट्टीसाठी गेला होता. त्या म्हणाल्या, “माझ्या मुलाला काही झाले नाही. त्याने दुसऱ्या मजल्यावरून उडी मारली.”
‘मला माझ्या मुलाला आत जाऊन पाहायचे आहे’
हा अपघात अहमदाबादमधील डॉक्टर्स हॉस्टेलवर घडला. न्यूज एजन्सी ANI शी बोलताना रमिलाबेन म्हणाल्या, “विमान हॉस्टेलवरच कोसळले. माझ्या मुलाला काही झाले नाही. त्याच्याशी माझे बोलणे झाले आहे. मला आत जाऊन त्याला पाहायचे आहे. तो म्हणाला की तो ठीक आहे, पण दुसऱ्या मजल्यावरून उडी मारल्याने त्याला किरकोळ जखम झाली आहे. मी आत गेले तरच खरे काय ते कळेल.”
वाचा: इंजिन खराब की इमारतीला धडकलं?; 242 प्रवाशी घेऊन निघताच 15 मिनिटात कसं झालं विमान क्रॅश?
#WATCH एयर इंडिया विमान दुर्घटना: गुजरात के अहमदाबाद के सिविल अस्पताल पहुंची रमीला ने कहा, “मेरा बेटा लंच ब्रेक के दौरान हॉस्टल गया था और विमान वहीं दुर्घटनाग्रस्त हो गया। मेरा बेटा सुरक्षित है और मेरी उससे बात हुई है। वह दूसरी मंजिल से कूद गया था इसलिए उसे कुछ चोटें आई हैं।” pic.twitter.com/AFgdvWiV0k
— ANI_HindiNews (@AHindinews) June 12, 2025
169 भारतीय प्रवासी होते
ज्या डॉक्टर्स हॉस्टेलवर विमान कोसळले, तिथेही मोठ्या नुकसानाची शक्यता आहे. परंतु याबाबत अद्याप पुष्टी झालेली नाही. देश-विदेशातील नेत्यांनी या अपघाताबद्दल दुखः व्यक्त केले आहे. या विमानात एकूण 242 प्रवाशांपैकी 169 भारतीय होते, तसेच 2 वैमानिक आणि 10 क्रू मेंबर्स होते.
मेघानी नगर परिसरातील हॉस्टेल
विमान कोसळलेली इमारत पूर्णपणे जळून खाक झाली आहे. मेघानी नगर हा परिसर सरदार वल्लभभाई पटेल विमानतळाजवळ आहे आणि याच परिसरात हे हॉस्टेल आहे. पंतप्रधान नरेंद्र मोदी यांनी केंद्रीय गृहमंत्री आणि हवाई वाहतूक मंत्र्यांशी या प्रकरणी चर्चा केली आहे.
माजी मुख्यमंत्री विजय रुपाणीही होते विमानात
या विमानात गुजरातचे माजी मुख्यमंत्री विजय रुपाणीही होते, जे आपल्या मुलीला भेटण्यासाठी लंडनला जात होते. विमानाने उड्डाण केल्यानंतर अवघ्या पाच मिनिटांतच हा अपघात घडला. बोइंग ड्रीमलाइनर 787 ची प्रवासी क्षमता 300 आहे. वैमानिकाने मेडे (MAYDAY) कॉल केला होता, ज्याचा अर्थ आपत्कालीन परिस्थिती असा होतो.
