Vande Bharat Sleeper coach : ‘आरामात’ करा वंदे भारतचा प्रवास, स्लीपर कोचसाठी किती आला खर्च

नवी दिल्ली | 3 ऑक्टोबर 2023 : वंदे भारतने देशाला जवळ आणले आहे. स्वतंत्र रेल्वे बजेट नसताना केंद्र सरकारने रेल्वे विकासाला चांगलेच बळ दिले आहे. झटपट प्रवासासाठी वंदे भारत सर्वात लोकप्रिय ट्रेन ठरली आहे. अनेक राज्यांनी या ट्रेनची मागणी केली होती. ही देशाची सेमी हायस्पीड ट्रेन (Semi High Speed Train) आहे. सध्याच्या वंदे भारत एक्सप्रेसमध्ये केवळ बसून प्रवासाची व्यवस्था (Seating Arrangement) आहे. त्यामुळे प्रवाशांना एका मर्यादेबाहेर या ट्रेनमधून प्रवास करता येते नाही. नेमकी हीच समस्या ओळखून स्लीपर कोचची सुरुवात होत आहे. वंदे भारत स्लीपर कोच लवकरच देशाच्या रुळावरुन वेगे वेगे धावेल. रेल्वे मंत्रालयाने (Ministry of Railways) या स्लीपर कोच तयार करण्याचे आदेश दिले आहेत. या रेल्वेच्या बांधणीचे काम वेगाने सुरु आहे. पण तुम्हाला माहिती आहे का, त्यासाठी किती कोटी रुपयांचा खर्च आला आहे ते?

बैठ्या आसन व्यवस्थेपेक्षा जास्त खर्च

वंदे भारत एक्सप्रेसचा विकास भारतीय रेल्वेच्या मॅकेनिकल इंजिनिअर्संच्या टीमने केला आहे. 2018 मध्ये तिच्या बांधणीचे काम हाती घेण्यात आले होते. त्यावेळी 16 डब्ब्यांच्या एका ट्रेनसाठी जवळपास 115 कोटी रुपयांचा खर्च आला होता. पण कोरोनानंतर लोखंड आणि अन्य धातूंच्या किंमती वाढल्या. त्यामुळे एकूण खर्चात भर पडली. सध्या पण 115 कोटी रुपयांच्या घरातच खर्च येत आहे. पण स्लीपर वंदे भारतची किंमत बैठ्या आसन व्यवस्थेपेक्षा अधिक आहे.

काय आहे स्लीपर वंदे भारतची किंमत

स्लीपर वंदे भारत एक्सप्रेसची किंमत जास्त आहे. इंटेगरल कोच फॅक्टरीनुसार जवळपास 127 कोटी रुपयांचा खर्च त्यासाठी अपेक्षित आहे. या प्रकल्पासाठी रशियाच्या काइनेट रेल्वे सोल्युशन्सची (Kinet Railway Solutions) मदत घेण्यात येत आहे. रेल्वे विकास निगम लिमिटेडच्या (Rail Vikas Nigam Limited (RVNL) सहकार्याने हे काम सुरु आहे. करारानुसार 120 कोटी रुपयांत एक सेट तयार करण्यात येणार होता. या किंमतीवर वंदे भारतचे 200 ट्रेन सेट तयार करण्यात येत आहे.

पुढील वर्षी या महिन्यात भेटीला

चेन्नई येथील द इंटिग्रल कोच फॅक्टरीत (ICF) वंदे भारत स्लीपरच्या डिझाईनचे काम सुरु असून डिसेंबर अखेरपर्यंत त्याला मूर्त रुप मिळेल. पुढील वर्षात मार्च 2024 मध्ये ही स्लीपर ट्रेन तयार होऊन कारखान्याबाहेर पडेल आणि त्यानंतर लागलीच अथवा एका महिन्यात प्रवाशांच्या सेवेसाठी सुरु करण्यात येईल, अशी आशा आहे.

इतके कापणार अंतर

वंदे भारतचे तीन फॉर्मेट आहेत. 100 किलोमीटर पेक्षा कमी अंतरासाठी वंदे मेट्रो, 100-550 किलोमीटरसाठी वंदे चेअर कार आणि 550 किलोमीटर पेक्षा पुढील प्रवासासाठी वंदे स्लीपर ट्रेन असेल. पुढील वर्षात फेब्रुवारी ते एप्रिल या दरम्यान या ट्रेन धावण्याची शक्यता आहे.