37 वर्ष जुनं भोजपुरी गाणं, जे बनलं सलमान खानच्या करिअरचं सर्वात लोकप्रिय गाणं, 56 रुपयांमध्ये तयार झालेलं
भोजपुरीमधील 37 वर्षांपूर्वीचं हे गाणं हे लाखो चाहत्यांचं प्रचंड आवडीचं. गायकावाला मिळाले होते 56 रुपये मानधन. सलमान खानने या गाण्याला बनवलं सुपरहिट.
1989 मध्ये प्रदर्शित झालेल्या मैंने प्यार किया या सुपरहिट चित्रपटातील ‘कहे तोसे सजना’ हे गाणे आजही हिंदी चित्रपटसृष्टीतील सर्वात लोकप्रिय प्रेमगीतांपैकी एक मानले जाते. या गाण्याला बिहारच्या सुप्रसिद्ध लोकगायिका शारदा सिन्हा यांनी आवाज दिला होता.
विशेष म्हणजे, ज्या चित्रपटातून सलमान खानने बॉलिवूडमध्ये पदार्पण केले, त्याच चित्रपटातून शारदा सिन्हा यांनीही हिंदी चित्रपटसंगीत क्षेत्रात पाऊल ठेवले होते. या चित्रपटाने सलमान खान आणि भाग्यश्री यांना मोठी लोकप्रियता मिळवून दिली.
चित्रपटातील सर्व गाणी गाजली, मात्र भोजपुरी लोकसंगीताचा रंग असलेल्या ‘कहे तोसे सजना’ने रसिकांच्या मनात विशेष स्थान निर्माण केले. प्रेमभावना आणि नात्यांतील कोमलता व्यक्त करणारे हे गाणे आजही लग्नसमारंभ, संगीत कार्यक्रम आणि रोमँटिक प्लेलिस्टमध्ये आवर्जून ऐकले जाते.
या गाण्याशी संबंधित एक रंजक बाब म्हणजे शारदा सिन्हा यांना हे गाणे गाण्यासाठी केवळ 56 रुपये मानधन मिळाल्याची चर्चा आहे. आजच्या काळात एका गाण्यासाठी लाखो-कोट्यवधी रुपये खर्च होत असताना ही रक्कम आश्चर्यचकित करणारी मानली जाते.
सुमारे 1 कोटी रुपयांच्या बजेटमध्ये तयार झालेल्या ‘मैंने प्यार किया’ने बॉक्स ऑफिसवर तब्बल 45 कोटी रुपयांची कमाई केली होती. तर सलमान खानला त्याच्या पहिल्या चित्रपटासाठी सुमारे 30 हजार रुपये मानधन मिळाल्याचे सांगितले जाते.
