मुंबईतून तब्बल 16 हजार लीटर अवैध दारु जप्त

मुंबईतून तब्बल 16 हजार लीटर अवैध दारु जप्त

मुंबई : सध्या लोकसभा निवडणुकीची धामधूम सुरु आहे. या पार्श्वभूमीवर निवडणूक आयोगाच्या भरारी पथकाने 15 एप्रिलपर्यंत 16 हजार लीटर अनधिकृत मद्य पदार्थ साठा जप्त केला आहे. आचारसंहिता लागू झाल्यापासून आतापर्यंत निवडणूक आयोगाने 142 प्रकरणात सुमारे 16 हजार लीटर अनधिकृत मद्य पदार्थ साठा जप्त केला आहे. याची किंमत सुमारे 18 लाखांपेक्षा अधिक असल्याचे निवडणूक आयोगाने सांगितले आहे. या प्रकरणात 128 जणांना अटक करण्यात आली असून त्यांच्याकडून 2 लाख 55 हजार रुपये किंमतीची पाच वाहनही जप्त करण्यात आली आहेत.

गेल्या महिन्यात 10 मार्च रोजी निवडणूक आयोगाने लोकसभा निवडणुका जाहीर केल्या होत्या. त्या दिवसांपासून देशात आचारसंहिता लागू करण्यात आली. आचारसंहिता लागू झाल्याच्या दुसऱ्या दिवशी म्हणजेच 11 मार्चपासून मुंबई शहर तसेच उपनगरात निवडणूक आयोगातर्फे धडक कारवाई करण्यात येत आहे. यानुसार 11 मार्च ते 31 मार्च या कालावधीत 93 प्रकरणात तब्बल 9 हजार 924 लीटरचा अनधिकृत मद्यसाठा जप्त करण्यात आला आहे. याची किंमत सुमारे 9 लाख 49 हजार 775 रुपये इतकी आहे. या कालावधीत केलेल्या कारवाईत 84 व्यक्तींना अटक करण्यात आली आहे. तसेच अटक करण्यात आलेल्या व्यक्तीकडून 3 वाहनेही जप्त करण्यात आली असून त्यांची अंदाजे किंमत 1 लाख 95 हजार इतकी आहे. अशी माहिती मुंबई उपनगर जिल्ह्याचे जिल्हाधिकारी सचिन कुर्वे यांनी दिली आहे.

त्यानंतर 1 एप्रिल ते 15 एप्रिल या कालावधीत 49 प्रकरणात सुमारे 6 हजार 140 लीटर एवढा अनधिकृत मद्यसाठा जप्त करण्यात आला आहे. याची किंमत सुमारे 8 लाख 53 हजार 769 रुपये इतकी आहे. या कालावधीत केलेल्या कारवाईत 44 जणांना अटक करण्यात आली असून त्यांच्याकडून 60 हजार रुपये किंमतीची 2 वाहने जप्त करण्यात आली आहे.

दरम्यान 11 मार्चपासून ते 15 एप्रिलपर्यंत 142 प्रकरणात सुमारे 16 हजार 64 लीटर एवढा अनधिकृत मद्यसाठा जप्त करण्यात आला आहे. याची अंदाजे किंमत सुमारे 18 लाख 3 हजार 544 रुपये आहे. निवडणूक आयोगाने जप्त केलेल्या मद्यसाठ्यामध्ये 618 लीटर हातभट्टीची दारू, 13 हजार 200 लीटर एवढे मद्य निर्मितीसाठी वापरण्यात येणारे ‘वॉश’ रसायन, 524.28 लीटर देशी मद्य, 218.63 लीटर विदेशी मद्य, 251.87 लीटर बीअर, 1 हजार 194 लीटर ताडी आणि 60.2 लीटर इतर प्रकारचे मद्य या पदार्थांचा समावेश आहे. तसेच या कारवाईत 128 जणांना अटक करण्यात आली आहे. अटक केलेल्या व्यक्तींकडून 5 वाहनेदेखील जप्त करण्यात आली असून वाहनांची अंदाजे किंमत 2 लाख 55 हजार इतकी आहे.

कमेंट करा

कमेंट करा

Your email address will not be published. Required fields are marked *