उद्धव ठाकरे यांनी आषाढी एकादशीची महापूजा करु नये : गोपीचंद पडळकर

पंढरपूर : मुख्यमंत्री उद्धव ठाकरे यांनी आषाढी एकादशीची महापूजा करु नये, अशी मागणी भाजपचे विधान परिषद आमदार गोपीचंद पडळकर यांनी केली आहे. शेतकरी कुटुंबाला महापूजेचा मान देण्याचे पडळकर यांनी सुचवले. पंढरपुरातील विठ्ठल मंदिरात आषाढी एकादशीची शासकीय महापूजा करण्याचा मान दरवर्षी मुख्यमंत्र्यांना सपत्नीक देण्याची परंपरा आहे. (Gopichand Padalkar emphasis not allowing CM Uddhav Thackeray to perform Pandharpur Ashadhi Ekadashi Mahapooja)

“सध्या कोरोना संसर्ग असल्याने पंढरपुरात बाहेरील व्यक्ती, महाराज मंडळींना प्रवेश नसेल, तर यंदा मुख्यमंत्री उद्धव ठाकरे यांनी आषाढी एकादशीची महापूजा करु नये” असं गोपीचंद पडळकर पत्रकार परिषदेत म्हणाले. सामान्य शेतकरी, वारकरी कुटुंबाला विठ्ठल-रखुमाईच्या महापूजेचा मान द्यावा, असा आग्रह पडळकर यांनी धरला.

हेही वाचा : विधानसभेला पडल्याने पंकजाताईंना विधानपरिषद तिकीट नाकारलं, मग पडळकरांना कसं दिलं? खडसेंचा सवाल

दरम्यान, राष्ट्रवादीचे अध्यक्ष शरद पवार हे महाराष्ट्राला झालेला ‘कोरोना’ आहेत, अशी घणाघाती टीका पडळकर यांनी केली.

धनगर समाजाला फडणवीस सरकारने तरतूद केलेले एक हजार कोटी सुद्धा महाविकास आघाडी सरकारने दिले नाहीत. शरद पवार नाशिकला अवकाळी झाल्यानंतर गेले, कोकणात वादळानंतर गेले, पण अद्याप त्यांना मदत मिळाली नाही. सगळा फार्स सुरु आहे, असा आरोप गोपीचंद पडळकर यांनी केला.

कोण आहेत गोपीचंद पडळकर?

धनगर समाजाचे नेते म्हणून गोपीचंद पडळकर ओळखले जातात. आतापर्यंत धनगर आरक्षण आणि धनगर समाजाच्या प्रत्येक आंदोलनाचे नेतृत्व गोपीचंद पडळकर यांनी केलं आहे. (Gopichand Padalkar on Uddhav Thackeray)

धनगर समाजाचे नेते गोपीचंद पडळकर यांनी विधानसभा निवडणुकीच्या तोंडावर वंचित बहुजन आघाडीला रामराम ठोकत भाजपमध्ये घरवापसी केली होती. ‘वंचित’कडून लढताना लोकसभेत पराभव झाला. त्यानंतर विधानसभा निवडणूक त्यांनी भाजपच्या तिकिटावर लढली होती, मात्र बारामतीत त्यांचा अजित पवारांकडून मोठ्या फरकाने पराभव झाला होता. त्यांचे डिपॉझिट जप्त झाले. परंतु भाजपने त्यांना  विधानपरिषदेला संधी दिली.

VIDEO | 4 मिनिटे 24 हेडलाईन्स https://t.co/EyPgCmUDf2

— TV9 Marathi (@TV9Marathi) June 24, 2020

(Gopichand Padalkar emphasis not allowing CM Uddhav Thackeray to perform Pandharpur Ashadhi Ekadashi Mahapooja)