मनसे-ठाकरे गटाच्या युतीबाबत मोठी अपडेट, ‘या’ दोन बड्या नेत्यांची भेट, काय चर्चा झाली?

राज्यात गेल्या अनेक दिवसांपासून मनसे आणि ठाकरे गटाच्या युतीची चर्चा सुरु आहे. याबाबत दोन्ही पक्षांकडून सूचक विधानेही करण्यात आलेली आहेत. अशातच आता या युतीबाबत महत्वाची अपडेट समोर आली आहे. दोन्ही पक्षांच्या 2 प्रमुख नेत्यांनी एकमेकांची भेट घेतली असल्याची माहिती समोर आली आहे. याबाबत सविस्तर माहिती जाणून घेऊयात.

‘या’ दोन नेत्यांची झाली भेट

समोर आलेल्या माहितीनुसार, शिवसेना ठाकरे गटाचे सचिव वरुण सरदेसाई आणि मनसे नेते बाळा नांदगावकर यांची भेट झाली. या भेटीबाबत बाळा नांदगावकर यांनी दुजोरा दिला आहे. याबाबत बोलताना नांदगावकर यांनी, भेटीगाठी होतच असतात. मित्र म्हणून भेटतात.चर्चेसाठी भेटतात. वेगवेगळे विषय असतातच असं विधान केलं आहे. त्यामुळे या दोघांमध्ये युतीबाबत चर्चा झाली असल्याचे समोर आले आहे.

मनसे आणि ठाकरे गट 5 जुलै रोजी हिंदी सक्तीच्या निर्णयाविरोधात एकत्र मोर्चा काढणार आहे. याबाबत बोलताना नांदगावकर म्हणाले की, ‘राजकारणापेक्षा आपल्या अस्मितेच आणि अस्तित्वाचा प्रश्न आहे. याचा सर्वाधिक विचार केला पाहिजे. उद्याच्या मोर्चाचं विजयात रूपांतर करू असा विश्वास आहे.’

देवेंद्र फडणवीस योग्य निर्णय घेतील

पुढे बोलताना नांदगावकर म्हणाले की, ‘विरोधकांचा विषय इथे येतच नाही. जे कोणी विरोधक म्हणून आम्हाला बोलत आहे ते मराठी नाहीत का? त्यांची भाषा मराठी नाही का? देवेंद्र फडणवीस हे संवेदनशील मुख्यमंत्री आहेत. ते याचा नक्कीच विचार करतील. सर्वांना विचारात घेऊन काम करतील आणि कुठलीही सक्ती करणार नाहीत.’

हिंदी भाषिकांनाही मोर्चासाठी आमंत्रण

मनसे आणि ठाकरे गटाच्या हिंदी विरोधातील मोर्चासाठी सर्व पक्षांना आमंत्रण देण्यात येत आहे. याबाबत बोलताना नांदगावकर म्हणाले की, ‘आम्ही सगळ्यांना आमंत्रण देत आहोत. हिंदी भाषिकांना देखील आम्ही आमंत्रण दिलेले आहे. कारण याच महाराष्ट्राने आणि मराठीने त्यांना भरपूर काही दिले आहे. आता या भाषेचा सन्मान करण्याची वेळ आहे.’