संजय राऊत म्हणजे घरफोडे, त्यांच्या बोलण्याला शून्य किंमत; शिवसेनेच्या नेत्याचा घणाघात

मुंबई : शिवसेनेचे नेते संजय शिरसाट यांनी ठाकरेगटाचे नेते, खासदार संजय राऊत यांच्यावर टीका केली आहे. “संजय राऊत यांनी कुठेही जाऊन भाषण केलं आणि कुठेही आपलं मत मांडलं तरी त्यांच्या बोलण्याला शून्य किंमत आहे. संजय राऊत आधी घरफोडी करायचे. पण आता हा नवीन डाकू महाराष्ट्राच्या राजकारणामध्ये आलेला आहे. आधी उद्धव साहेबांचं घर फोडलं आणि आता शरद पवार साहेबांचं घर फोडण्याच्या मार्गावर ते आहेत”, अशा शब्दात शिरसाट यांनी घणाघात केला आहे.

आताच्या पत्रकार परिषदेने माजी मुख्यमंत्री उद्धव ठाकरे यांनी स्वत: सांगितलं की, मी मंत्रालयात जायचो नाही. खोटारडेपणाचा कळस हा संजय राऊत आहे. दरवेळेला खोटं बोलून माणसांमध्ये संभ्रम निर्माण करण्याचं काम संजय राऊत यांनी केलं आहे. बेताल वक्तव्य करून राजकारणामध्ये संभ्रम कसा निर्माण होईल आणि सगळे एकमेकांकडे कसे संशयाने पाहतील, हे एकमेव ध्येय त्यांचं सध्या आहे. त्यांची हीच वक्तव्य उद्धव साहेबांना घातक ठरणार आहे आणि पक्ष संपत आलेला आहे, असं शिरसाट म्हणाले आहेत.

कुठल्याही पक्षाच्या अध्यक्षाचा अपमान कराल आणि पुढील जाल तर तसं नसतं. महाविकास आघाडी ही टिकणार नाही, हे मी वारंवार सांगत आलेलो आहे. पुढची वज्रमूठ सभा पुढे ढकललेली आहे. असं त्यांनी सांगितलं पण ही सभा आता कधीच होणार नाही. महाविकास आघाडीचे तुकडे झाल्याशिवाय राहणार नाही हे भाकीत सत्यात उतरणार आहे, असंही शिरसाट म्हणाले आहेत.

राष्ट्रवादीचे नेते थोडीच शिवसैनिक आहेत. तुमचा सल्ला ते मान्य करायला. त्यांचे सल्ले सगळं मान्य करतात. तुम्ही त्यांना सल्ले द्यायच्या भानगडीत पडू नका, असं म्हणत शिरसाट यांनी उद्धव ठाकरे यांना टोला लगावला आहे.

शरद पवार यांच्या पुस्तकातील उल्लेखावर शिरसाट बोलले आहेत. शरद पवारांच्या बोलण्याला एका अर्थाने उद्धव ठाकरे यांनी संमती दिलेली आहे. मी कुठे गेलोच नव्हतो हे त्यांनी मान्य केलेला आहे. मी काही काम केले नाही हे देखील त्यांनी आता मान्य केलेलं आहे. शरद पवारांसारखा ज्येष्ठ नेते जेव्हा पुस्तक लिहितो. त्यावेळेला त्यांनी दाव्यासकट अनुभवाअंती लिहितात, असं संजय शिरसाट म्हणाले आहेत.