‘अब तो एक ढुंढो हजार मिलते है’; राणेंचा उद्धव ठाकरे- आदित्य यांच्यावर नाव न घेता ‘प्रहार’

मुख्यमंत्री उद्धव ठाकरे आणि भाजप नेते नारायण राणे यांच्यातील कलगीतुरा पुन्हा एकदा रंगला आहे. (narayan rane slams cm uddhav thackeray)

भाजप नेते नारायण राणे आणि मुख्यमंत्री उद्धव ठाकरे

भीमराव गवळी | Updated on: Mar 07, 2021 | 8:30 AM

मुंबई: मुख्यमंत्री उद्धव ठाकरे आणि भाजप नेते नारायण राणे यांच्यातील कलगीतुरा पुन्हा एकदा रंगला आहे. काल मुख्यमंत्र्यांनी मेडिकल कॉलेजच्या मुद्द्यावरून राणेंना डिवचल्यानंतर राणेंनीही पलटवार करत मुख्यमंत्र्यांवर टीकेची झोड उठवली होती. आता राणेंनी थेट शिवसेनाप्रमुख बाळासाहेब ठाकरे यांच्या विधानाच्या माध्यमातूनच मुख्यमंत्री उद्धव ठाकरे आणि पर्यावरण मंत्री उद्धव ठाकरे यांच्यावर नाव न घेता प्रहार केले आहेत. (narayan rane slams cm uddhav thackeray)

नारायण राणे यांच्या दैनिक ‘प्रहार’मध्ये पान क्रमांक एकवर शिवसेना प्रमुख बाळासाहेब ठाकरे यांचा एक किस्सा छापण्यात आला असून त्यावर राणेंनी भाष्य केलं आहे. ‘बाळासाहेब, आपण व्यंगचित्रं करण्याचे काम कमी केलेत. या प्रश्नास उत्तर देताना बाळासाहेब खंत व्यक्त करत म्हणत, व्यंगचित्र काढण्यासारखे चेहरे राहिले नाहीत. त्या उंचीचे व्यक्तिमत्त्व नजरेस पडत नाही. दर्जेदार विषय गवसत नाहीत. विकृत आणि विदूषक कमी झाले. आज बाळासाहेब असते तर… उत्सुफूर्तपणे कुंचला उचलला असता अन् दिवसागणिक शेकडो व्यंगचित्रं केली असती… अब तो एक ढुंढो हजार मिलते है, और तो घर में ही दो दो बसते है’, अशी खोचक टीका राणेंनी केली आहे. राणेंनी बाळासाहेबांच्याच विधानाचा वापर करून मुख्यमंत्र्यांवर हा बोचरा वार केला आहे.

आज बाळासाहेब असते तर…

आजच्या दैनिक ‘प्रहार’मधील पहिल्या पानावर ही टीक करण्यात आली आहे. बाळासाहेब ठाकरे यांचा व्यंगचित्रं काढतानाचा फोटो छापण्यात आला आहे. त्यावर ‘अब तो एक ढुंढो हजार मिलते है’, असं लिहिलं आहे. वर फोटोला ‘आज बाळासाहेब असते तर…’ अशी कॅप्शन दिली आहे आणि सर्वात शेवटी ‘खा. नारायण राणे यांच्या संग्रहातून’ असं म्हटलं आहे.

उद्धव ठाकरेंची टीका

दरम्यान काल मुख्यमंत्री उद्धव ठाकरे यांनी कोकणातील लघू पाटबंधारे योजनांचे ऑनलाईन उद्घाटन केले. यावेळी त्यांनी मेडिकल कॉलेजच्या मुद्द्यावरून राणेंवर नाव न घेता टीका केली होती. आपण सत्ताधारी आहोत. आपल्या पक्षाचा प्रमुख राज्याचा मुख्यमंत्री आहे. राष्ट्रवादी आणि काँग्रेस आपल्यासोबत आहे. आपली सत्ता असूनही तुम्ही काहीही मागणी करत नाही. तुम्ही रत्नागिरीसाठी सरकारी वैद्यकीय महाविद्यालय मागितलं. तुम्ही स्वत:साठी काही मागितलं असतं. पण तुम्ही ते केलं नाही. काही लोकं असतात, इकडे तिकडे काही करून स्वत:साठी काही तरी मागतात. तुम्ही मात्र कोकणासाठी सरकारी कॉलेज मागितलं. याचा मला अभिमान वाटतो. तुम्ही शिवसेनाप्रमुख बाळासाहेब ठाकरेंचे सच्चे शिवसैनिक आहात. त्यामुळेच तुम्ही स्वत:साठी काही मागितलं नाही, असा टोला त्यांनी राणे यांना नाव न घेता लगावला होता.

राणेंचा पलटवार

मुख्यमंत्र्यांनी टीका केल्यानंतर राणेंनीही त्यावर पलटवार करून कालच मुख्यमंत्र्यांना प्रत्युत्तर दिलं होतं. आपण रुग्णालय आणि वैद्यकीय महाविद्यालय स्वखर्चातून जनतेसाठी आणि विद्यार्थ्यांसाठी काढलं आहे, सरकारी पैशातून नाही. श्रीयुत उद्धव ठाकरे यांनी महाराष्ट्रात स्वखर्चाने एखादी बालवाडी तरी चालू करुन दाखवावी, अशी खोचक टीका राणे यांनी होती. (narayan rane slams cm uddhav thackeray)

पुनः पुन्हा दळण का दळायचे?” आणीबाणीच्या मुद्द्यावरुन राऊत यांनी राहुल गांधींना फटकारलेhttps://t.co/MqAcujYSOw #sanjayraut | #RahulGandhi | #Emergency |

— TV9 Marathi (@TV9Marathi) March 7, 2021