नाशिकचे नगरसेवक अज्ञातस्थळी, फोडाफोडी टाळण्यासाठी भाजपची खेळी

नाशिक : गेले काही दिवस राज्यात शिवसेना आणि भाजपमध्ये सत्तास्थापनेवरुन सत्तासंघर्ष सुरु आहे. याच दरम्यान आता नाशिक महानगरपालिकेच्या महापौर आणि उपमहापौर पदाची निवडणूक येत्या 22 नोव्हेंबर रोजी होणार आहे. यामध्ये महापौरपदाच्या निवडणुकीत भाजपच्या काही नगरसेवकांची (nashik bjp corporator picnic) फोडाफोडी होऊ शकते. या भीतीने भाजपने आपले नगरसेवक (nashik bjp corporator picnic) अज्ञातस्थळी सहलीला रवाना केले आहेत. पण सात नगरसेवकांनी या सहलीला जाण्यास नकार दिल्याने मोठी खळबळ उडाली आहे.

सहलीला जाण्यास नकार दिलेले सात नगरसेवक हे भाजपमधून राष्ट्रवादीमार्गे शिवसेनेत गेलेल्या बाळासाहेब सानप यांचे समर्थक आहेत, अशी चर्चा सध्या सुरु आहे. सात नगरसेवक अनुपस्थित असल्याने भाजपच्या गोटातही अस्वस्थता आहे. मात्र भाजपचे सर्व नगरसेवक सहलीला येतील असा दावा भाजपचे गटनेते करत आहेत.

नाशिक महानगरपालिकेत भाजपला बहुमत आहे. पण असे असतानाही यंदाची महपौरपदाची निवडणूक भाजपसाठी जड जात आहे. शिवसेना, काँग्रेस, राष्ट्रवादी आणि मनसे यांनी एकत्र येत भाजपला कोंडीत पकडण्याची रणनीती आखली आहे. त्यामुळे भाजप कोणताही धोका पत्कारायला तयार नाही.

शहराच्या तीन मतदारसंघातून नगरसेवक बसमध्ये आणण्याची जवाबदारी स्थानिक आमदारांना देण्यात आली आहे. विशेष म्हणजे 85 वर्षाच्या सर्वात वयोवृद्ध नगरसेविका भिकाबाई बागुलही या सहलीला रवाना झाल्या आहेत.

दरम्यान, भाजपचे पूर्व नाशिकचे माजी आमदार बाळासाहेब सानप यांचं पक्षांनं तिकीट कापल्याने त्यांनी राष्ट्रवादीतून निवडणूक लढवली. पण पराभूत झाल्याने अवघ्या आठ दिवसात त्यांनी शिवसेनेत प्रवेश केला. सानप यांचा नाशिक पालिकेत प्रभाव आहे, ते भाजपचे नगरसेवक फोडू शकतात, असा विश्वास शिवसेनेला आहे. त्याचा उपयोग करुन शिवसेना महापौर बसवण्याच्या तयारीत आहे. विरोधी पक्षनेतेपद शिवसेनेकडे आहे. त्यामुळे काँग्रेस, राष्ट्रवादी, अपक्ष आणि मनसे यांच्या साथीने शिवसेना आपला महापौर बसवण्याच्या प्रयत्नात आहे. त्यामुळे महापौरपदाच्या निवडणुकीसाठी चुरस वाढली आहे.

नाशिक महापालिकेतील सद्यपरिस्थिती

एकूण जागा 122

भाजप (स्पष्ट बहुमत) : 66 होते आता 65

(सरोज अहिरेंचा राजीनामा, देवळाली मतदारसंघातून राष्ट्रवादी आमदार म्हणून निवडणूक जिंकली)

शिवसेना : 34

(1 सदस्य दिलीप दातीर यांनी राजीनामा देऊन मनसेमधून विधानसभा निवडणूक लढवली पण त्यांचा पराभव झाला.)

काँग्रेस : 7

राष्ट्रवादी काँग्रेस : 7

मनसे : 6

रिपाई : 1