निवडणुकीपूर्वीच नितीन गडकरींचा मोठा निर्णय, आजच अ‍ॅक्शन; उत्तर प्रदेशात काय घडणार?

उत्तर प्रदेश विधानसभा निवडणुकांचं काऊंटडाऊन सुरू झालं आहे. पुढच्या वर्षी राज्यात निवडणुका होणार असल्याने त्यापूर्वीच भाजप कामाला लागला आहे. त्याचाच एक भाग म्हणून केंद्रीय रस्ते वाहतूक मंत्री नितीन गडकरी आज उत्तर प्रदेशात आठ नवीन हायवेंचं लोकार्पण आणि शिलान्यास करणार आहेत. जौनपूर येथील मुंगराबादशाहपूरच्या सार्वजनिक इंटर कॉलेजच्या मैदानावर हा समारंभ होणार आहे. 33.77 अब्जाच्या या योजना आहेत. यावेळी नितीन गडकरी उपस्थितांना संबोधित करणार आहेत. यावेळी ते 467 कोटींच्या पाच योजनांचं शिलान्यास आणि 3210 कोटींच्या तीन योजनांचं लोकार्पण करणार आहेत.

नितीन गडकरी जिल्ह्यात दोन तास राहणार आहेत. 1.15 वाजता ते रवाना होतील. जौनपूरला दिलेल्या या योजनांचा प्रतापगड, भदोही आणि आजमगडला फायदा होणार आहे. गडकरी ज्या परियोजनांचं लोकार्पण, शिलान्यास आणि भूमिपूजन करणार आहेत. त्याचा लाभ भदोही आणि आजमगडला मिळणार आहे. जौनपूरमध्ये एनएच 128 एवर लता मंगेशकर चौकातून प्रसाद इन्स्टिट्यूटपर्यंत 33 कोटी खर्चून बनणाऱ्या 4.7 किलमोटरच्या फोरलेनचा फायदा आजमगडला होणार आहे.

भाजप सक्रिय

उत्तर प्रदेशात पुढच्या वर्षी लोकसभेच्या निवडणुका होत आहेत. या निवडणुकीत पुन्हा एकदा यश मिळवण्यासाठी भाजपने कंबर कसली आहे. भाजप आतापासूनच उत्तर प्रदेशात अनेक टप्प्यांमध्ये काम करत आहे. राज्याचे मुख्यमंत्री योगी आदित्यनाथ संपूर्ण राज्यातील प्रत्येक जिल्ह्यात जाऊन नागरिकांशी संवाद साधत आहेत. कार्यकर्ते आणि पदाधिकाऱ्यांशी संवाद साधून मोट बांधणी करत आहेत. तर पक्षाचे प्रभारी विनोद तावडे हे कार्यकर्ते आणि पदााधिकाऱ्यांना भेटून समस्या ऐकून घेत आहेत.

तसेच निवडून येणारे उमेदवार आणि परफॉर्मन्स डाऊन असलेल्या आमदारांचा रिपोर्टही तयार करत आहेत. याशिवाय राज्यातील महत्त्वाचे छोटे पक्ष आणि निवडणुकीत प्रभाव पाडणाऱ्या सामाजिक संघटनांशी तावडे संवाद साधत असून मतांची मोट बांधत आहेत. तर, दुसरीकडे नितीन गडकरी यांनी उत्तर प्रदेशात विकास कामांचा धडका लावला आहे. त्यामुळे उत्तर प्रदेशात भाजप एकाच पातळीवर अनेक कामं करून राज्यातील वातावरण ढवळून काढताना दिसत आहे.

मोदी सक्रिय होणार

भाजपच्या पुढच्या टप्प्यात केंद्रातील अनेक बडे मंत्री उत्तर प्रदेशात येणार असल्याचं सांगितलं जात आहे. उत्तर प्रदेशातील महत्त्वाच्या कामांचं भूमिपूजन करण्याबरोबरच राज्यातील जनतेशीही ते संवाद साधणार आहेत. त्यानंतर शेवटच्या टप्प्यात पंतप्रधान नरेंद्र मोदी हे उत्तर प्रदेशात येणार असल्याची सूत्रांची माहिती आहे. त्यामुळे उत्तर प्रदेशातील वातावरण अधिकच ढवळून निघणार असल्याचे संकेत मिळत आहेत.